М.Шәймиев: "Без мигрантларның куркынычсызлыгын кайгыртырга тиешбез"

Оренбургта РФ президентының Идел буе федераль округында Вәкаләтле вәкиллеге каршындагы Советның утырышы тәмамланды. Анда Татарстаннан президент Минтимер Шәймиев һәм ТР Дәүләт Советы рәисе Фәрит Мөхәммәтшин дә катнашкан иде. Утырышны Идел буе федераль округы вәкиле Александр Коновалов алып барды.

"Татар-информ" хәбәренчә, сөйләшүдә шулай ук РФ Федераль Җыены Федерация Советы рәисе урынбасары Александр Торшин, РФ Дәүләт Думасы рәисе урынбасары Вячеслав Володин, РФ Федераль куркынычсызлык хезмәте директоры армия генералы Николай Патрушев, Идел буе федераль округы субъектлары башлыклары, федераль дәүләт хакимияте органнары вәкилләре дә катнашкан.

Көн тәртибенә "Чик һәм таможня контролен ныгыту, миграция сәясәтен камилләштерү чаралары турында" һәм "Җинаятьчелек белән көрәш һәм хокук бозурларны кисәтү буенча федераль башкарма хакимиятнең территориаль органнары һәм РФ субъектлары хакимият органнары эшчәнлеген җайга салу турында"гы ике мәсьәлә куелган иде. Утырышта Оренбург өлкәсе губернаторы Алексей Чернышев һәм Татарстан Президенты Минтимер Шаймиев, шулай ук Советның башка әгъзалары да чыгыш ясады.

Киңәшмә тәмамланганнан соң журналистлар белән әңгәмәдә Минтимер Шәймиев: "Утырышта бик җитди мәсьәләләр каралды. Алар дәүләт иминлегенә, шул исәптән дәүләт чиге аша гражданнарны һәм товарларны кертүгә, миграция сәясәтенә кагылды", - дип билгеләп үтте. Республика җитәкчесе Россия президенты В.Путин Федераль Җыенга җибәргән юлламасында, һәр теләгән ватандашыбыз Россиягә күчеп кайта алсын өчен, илдәге миграция шартларын яхшыртуны максатын итеп куйганлыгын искә алды. "Монда сүз ватандашлар турында гына түгел, Россиягә килеп эш корган кешеләрне тиешле конституция хокуклары белән тәэмин итү турында да бара. Без аларга цивилизацияле мөнәсәбәттә булырга, дәүләтара килешүләр кысалырында аларның куркынычсызлыгын кайгыртырга тиешбез. Монда техник яктан күп эш башкарырга кирәк", - диде Минтимер Шәймиев.

Татарстан президенты үзенең чыгышында мигрантларның социаль җайлашу мәсьәләсен чишкәндә төгәл һәм ачык вәкаләтләр белән эш йөртергә дә чакырды.