Минтимер Шәймиев Казан хакимиятенең яңа башлыгы буларак Илсур Метшинны тәкъдим итте

Казан ратушасында Татарстан Президенты Минтимер Шәймиев Казан хакимиятенең яңа башлыгын тәкъдим итте. ТР Президенты Указы нигезендә, яңа башлык итеп Түбән Кама районы һәм шәһәре хакимияте башлыгы Илсур Метшин билгеләнде.

Минтимер Шәймиев Казан шәһәре муниципаль берәмлегенең вәкаләтле органы депутатлары белән очрашуны ачканда, реставрациядән соң Казан ратушасының тормышы активлашуын билгеләп үтте. Республика Илбашы РФ Президенты Владимир Путин Указы нигезендә, Казан хакимияте башлыгы Камил Исхаковның РФ Президентының Ерак Көнчыгыш федераль округында тулы вәкаләтле вәкил сыйфатында дәүләт хезмәтенә чакырылуын искәртеп үтте. Минтимер Шәймиев фикеренчә, бу Россия дәүләте башлыгы ягыннан безнең республикага зур хөрмәт билгесе. “Камил Исхаковка яңа вазифага билгеләнү карары җиңел бирелгән дип уйламыйм, әмма бу Россия Федерациясе Президентының аңа карата югары дәрәҗәдә ышануын дәлилли”, - дип ассызыклады ул.

Камил Исхаковның Казан шәһәре башлыгы вазифасын башкару турында сөйләгәндә, Татарстан Президенты соңгы вакытта башкалада масштаб, вакыт буенча башкарылган эшләр горурлануга лаек, дип билгеләп үтте. Республика Илбашы сүзләренчә, күп еллар дәвамында бергә эшләгәндә Татарстан җитәкчелеге шәһәр хакимияте белән үзара аңлашкан.

Камил Исхаковның РФ Президентының Ерак Көнчыгыш федераль округында тулы вәкаләтле вәкиле итеп билгеләнү сәбәпле, Казан хакимияте башлыгы вазифасыннан азат итү турындагы Указны укыгач, Минтимер Шәймиев барлык татарстанлылар һәм казанлылар исеменнән Казанның экс-мэрына алдагы эшләрендә уңышлар һәм муллык теләде. ТР Президенты Указы нигезендә, Камил Исхаков дәүләт бүләге - “Татарстан Республикасы каршындагы хезмәтләре өчен” ордены белән бүләкләнде. Минтимер Шәймиев алкышлар астында Казан хакимиятенең элеккеге башлыгына орден, шулай ук исемле президент сәгатен тапшырды.

“Бүген тормыш яңа бурычлар куя, - дип дәвам итте Президент. – Башкалада хакимиятсез булырга мөмкин түгеллеген исәпкә алып, Камил Исхаков белән киңәшләшеп һәм Илсур Метшиннан рөхсәт алып, мин Казан хакимияте башлыгы вазифасына Илсур Метшинны билгеләү турында карар кабул иттем”. Минтимер Шәймиев Түбән Кама районы һәм шәһәре хакимияте башлыгы Илсур Метшинның Казан хакимияте башлыгы вазифасына билгеләнүе турында Указны укыды. “Без башкала белән җитәкчелек итүне кемгә тапшыру турында озак уйладык. Депутатлар корпусы, предприятие җитәкчеләре, шәһәр хакимиятендә дә лаеклы кешеләр бар. Нәтиҗәдә бик җиңел булмаган карар кабул ителде, чөнки Илсур Рәисович җиде ел дәвамында республиканың зурлыгы буенча өченче урында торган шәһәр белән уңышлы җитәкчелек итә”, - дип билгеләп үтте Минтимер Шәймиев. Ул Түбән Каманың Бөтенроссия конкурсында “Россиянең иң төзек шәһәре” исеменә лаек булуын искә төшереп үтте. Президент Илсур Метшинның җитәкчелек тәҗрибәсе турында сөйләгәндә депутатларга Түбән Кама башлыгының үз вакытында Казанда укуын, Казанның Совет районы хакимияте аппаратын җитәкләвен, “Казан бистәсе” территориясенең префекты булуын хәбәр итте.

Минтимер Шәймиев яңа сайланган безнең башкала җитәкчесе өчен әлеге эш озак елларга булыр дип ышаныч белдерде.

Татарстан Президенты Казан шәһәре муниципаль берәмлеге вәкаләтле органнары депутатларына мөрәҗәгать итеп, башкаланың алдагы үсеш хәрәкәте программасын билгеләп куйды. Ул шулай ук Казанның тарихи өлеше төзелеш барышында беренчел күренештә калырга тиеш, дип искә төшереп узды. «Без аны чамалы яңартып, реставрацияләргә тиеш. Хәзер Казанның 1000 еллыгыннан соң, тынычрак режимда эшләргә мөмкинлек туды», дип билгеләп узды Президент. Аның сүзләренә караганда, шәһәрнең ультразаманча өлеше Казансу елгасының икенче ярында: «Миллениум» күпереннән алып «Идел-пресс» нәшрият йортына кадәр елга буенда һәм Маркиз утравына кадәр урнашачак. Бүген муниципаль берәмлекләр депутатлары алдында тагын да мөһимрәк бурыч – Казан ишегалларын төзекләндерү, дип билгеләп узды республика башлыгы. Әлеге эшнең нәтиҗәсе чираттагы эре объектны тапшыру кебек күзгә күренә торган булмаса да, бүләк булып безнең шәһәрдә яшәүчеләрнең ышанычы торачак, диде Минтимер Шәймиев.

Вәкаләтле орган депутатларына Казанның элеккеге хакимият башлыгы Камил Исхаков та мөрәҗәгать итте. Ул Минтимер Шәймиевкә 16 ел дәвамында булышлык иткәне, яхшы җитәкчелек мәктәбе өчен чын йөрәктән рәхмәт белдерде. РФ Президентының Ерак Көнчыгыш федераль округындагы яңа билгеләнгән тулы вәкаләтле вәкиле яңа җаваплы эшендә үз вазифаларын лаеклы башкарырга һәм гомумроссия сәяси киңлегендә Татарстан кадрларының дәрәҗәсен төшермәскә вәгъдә итте. Илсур Метшинның Казан хакимияте башлыгы итеп сайлануы турында сөйләгәндә, аның профессиональ сәләтенә ышаныч белдерде. «Ул башкарган эшләр уңышлы булыр дип уйлыйм», дип ассызыклады Камил Исхаков.

Җыелучылар алдында чыгыш ясап, Илсур Метшин Татарстан Президентына үзенә күрсәткән ышанычы өчен рәхмәт белдерде һәм үзенә йөкләнгән зур җаваплылыкны таныйм дип билгеләп узды. «Бүген башкала бик югары планка алды. Мин яңа вазифага көчле оештыручыдан һәм хуҗалыкчыдан соң киләм. Мин тырышкан очракта һәм безнең уртак көч белән алга хәрәкәтне тәэмин итәргә һәм безнең башкаланы тагын да матуррак итәргә мөмкин булыр дип уйлыйм», - дип белдерде Илсур Метшин һәм Казан шәһәре муниципаль берәмлеге вәкиллекле органы депутатларының ярдәменә өметләнәм дип өстәде.

И.Р.Метшинның биографиясе.

Казанның яңа хакимият башлыгына 36 яшь. Ул Түбән Каманың 11нче урта мәктәбен тәмамлап, Казан дәүләт университетының юридик факультетына укырга кергән. Вузда укуын 1992 елда, Совет армиясе сафларында хезмәт итеп кайткач (1988-1989 елларда), тәмамлаган. 1999 елның декабрендә Илсур Метшин КДУ юридик факультетының дәүләт һәм хокук теориясе һәм тарихы кафедрасы каршындагы аспирантураны һәм РФ Хөкүмәте каршындагы Законнар чыгару һәм чагыштырма хокук белеме институтында “РФ составында республиканың (ТР мисалында) хокукый системасы” кандидатлык диссертациясен яклап, уңышлы төгәлләгән.

24 яшендә үк Илсур Метшин Казанның Совет районы хакимиятенең торак хосусыйлаштыру агентлыгы башлыгы итеп билгеләнә. 1995 елда ул Совет районы хакимияте башлыгы аппараты җитәкчесе була. 1997 елдан – Татарстан башкаласының Вахитов районы башлыгының беренче урынбасары – “Казан бистәсе”нең беренче префекты.

1998 елның мартында Түбән Кама районы һәм шәһәре хакимияте башлыгы булгач, И.Метшин гади шәһәрленең мәнфәгатьләрен беренче урынга куйды. Ул чагында республиканың иң эре шәһәрләренең берсендә социаль-икътисади вәзгыять гади түгел иде. Республика Президенты куйган бурычны – Түбән Кама районы һәм шәһәрен лидерлыкка чыгару, Татарстанның әһәмиятле төбәгендә хәлне тамырдан үзгәртү – Метшин искиткеч үтәп чыга. Шәһәр бюджетының 90 проценты социаль ихтыяҗларга (мәгариф, сәламәтлек саклау, торак-коммуналь хуҗалык, иҗтимагый транспорт) китә. 2001 елда Түбән Кама “Россиянең иң төзекләндерелгән шәһәре” бөтенроссия конкурсында җиңә. Бу шәһәр инфраструктурасын төзекләндерү һәм үстерү программасын гамәлгә ашыруда максатчан һәм конструктив эшчәнлек алып бару ярдәмендә мөмкин булды.

Шәһәр һәм районда “Түбән Кама шәһәре бюджет даирәсе учреждениеләре тарафыннан энергетика ресурсларын һәм суны куллануның нәтиҗәлелеген арттыру” программасы эшкәртелеп гамәлгә кертелгән. Ул бюджет акчаларын шактый экономияләүгә сәбәп булган. Энергия саклау буенча Республика конкурсы нәтиҗәләренә караганда, Түбән Кама ике ел рәттән Татарстан Хөкүмәтенең беренче премиясен алды.

2002 елда Түбән Кама башкала булмаган шәһәрләр арасыннан беренче булып Идел буе федераль округының мәдәни башкаласы итеп игълан ителде. “Идел буе федераль округының мәдәни башкаласы-2002” программасын гамәлгә кую планына федераль, республика шәһәр дәрәҗәсендә 400дән артык чара керде. “Түбән Кама - Идел буе федераль округының мәдәни башкаласы-2002” фестивале 2002 елның 25 гыйнварында Түбән Кама шәһәре һәм районы хакимияте башлыгы призына вокалчылар конкурсы буенча булган. 2002 елның маенда “Мәдәни башкала” кысаларында Түбән Камада “Идел буе федераль округы эфирында мәдәният” дип аталган төбәк телекомпанияләренең конкурсы булды. Бүген фестивальнең чикләре киңәйгән – 2004 елда ул халыкара конкурска әйләнде.

Илсур Метшин җитәкчелегендә Түбән Кама Россиянең эре спорт үзәгенә әйләнде. Шәһәр һәм районда спортны үстерү өчен зур көч куела. Шәһәрнең профессиональ спорт клублары танылды. Үзе Метшин футбол һәм хоккей белән мавыга. Ул даими Түбән Каманың спорт мәйданнарында шөгыльләнә.

2003 ел нәтиҗәләре буенча Түбән Кама “Татарстан Республикасының иң төзек шәһәре” исеменә лаек булган, шулай ук Бөтенроссия энергия саклаучы технологияләр конкурсында җиңү яулады. 2003 елда Түбән Камага икенче тапкыр “РФның иң төзек шәһәре” исеме бирелде.

2002 елда Илсур Метшин “Иң яхшы шәһәр мэры” номинациясендә “Россиянең милли олимпы” премиясе белән бүләкләнде.

2003 елда дәүләт үсешенә уңай йогынты ясаган өчен һәм эшчәнлекнең рейтинг бәясе нәтиҗәләре буенча аңа “Россия өчен” (Санкт-Петербург) алтын ордены тапшырылды. Түбән Кама Татарстан башкаласының 1000 еллык юбилеен бәйрәм итү белән бәйле чараларга әзерлек һәм үткәрү буенча зур ярдәм күрсәтте. 2005 елда РФ Президенты Указы нигезендә, Түбән Кама хакимияте башлыгына “Казанның 1000 еллыгы истәлеге” медале тапшырылды.

1999 елда Рус эшмәкәрләре академиясе Илсур Метшинны дәрәҗәле профессор итеп сайлады. Казан хакимиятенең яңа башлыгы өйләнгән, ике улы һәм кызы бар. Музыка белән кызыксына, "Машина времени" төркеме җырларын яратып тыңлый.