Минтимер Шәймиев: “Вокзал яны мәйданы хәзер Казанның иң матур мәйданнарыннан берсе булырга тиеш”

29 июльдә Татарстан Президенты Минтимер Шәймиев һәм РФ транспорт министры Игорь Левитин реконструкциядән соң Казанның шәһәр яны вокзалын тантаналы ачуда катнашты.

Әлеге чарада шулай ук “Россия тимер юллары” ААҖ вице-президенты Сергей Козырев, ТР Премьер-министры Рөстәм Миңнеханов, ТР Премьер-министры урынбасары – транспорт һәм юл хуҗалыгы министры Владимир Швецов, Горький тимер юллары башлыгы Виктор Сехин, Казан хакимияте башлыгы Камил Исхаков, Горький тимер юлларының Казан бүлекчәсе башлыгы Иван Белов һәм башка рәсми затлар катнашты. Бәйрәм митингында шәһәр яны элемтәсендә пассажирларга хезмәт күрсәтү буенча Казан дирекциясе хезмәткәрләре җыелды.

Чарада катнашучыларга сәламләп, Татарстан Президенты Казанның шәһәр яны вокзалын реконструкцияләүгә өлеш керткән федераль һәм республика дәрәҗәсендәге транспорт ведомстволарына рәхмәт белдерде. “Тимер юлчылар белән ни хакында гына килешсәк тә, ул вакытында үтәлә”, - дип ассызыклады Минтимер Шәймиев. Аның сүзләренчә, Кукмара вокзалында эшләр тәмамлануга, республикада барлык вокзал биналары яхшы хәлгә китереләчәк. Моннан тыш, соңгы елларда Горький тимер юлы Казан бүлекчәсенең поездлар составы 32 процентка яңартылган. Монда аның башлыгы Иван Беловның өлеше зур, диде республика башлыгы. Казанның 1000 еллыгына ачылырга тиешле объектлар арасында шәһәр яны вокзалы архитектур чишелеше буенча иң матурлардан санала. Ә вокзал яны мәйданы хәзер Казанның иң матур мәйданнарыннан берсе булырга тиеш, диде Минтимер Шәймиев.

РФ транспорт министры Игорь Левитин, үз чиратында, “Россия тимер юллары” ААҖ компаниясенә күркәм традицияне дәвам иткән өчен рәхмәт белдерде. Ул барлык тимер юл хезмәткәрләрен якынлашып килүче һөнәри бәйрәмнәре белән, ә казанлыларны башкаланың 1000 еллыгы белән котлады. “Бу – безнең уртак бәйрәмебез”, - дип билгеләп үтте Игорь Левитин.

Чара барышында Казан бүлекчәсе хезмәткәрләре рәхмәт хатлары һәм мактау билгеләре белән билгеләп үтелде. Символик тасманы кисеп, Минтимер Шәймиев, Игорь Левитин, Сергей Козырев һәм Камил Исхаков башкаланың яңартылган шәһәр яны вокзалын ачты. Реконструкция барышында коммуникация челтәрләре яңартылган, өченче кат рәвешендә өстәмә корылма барлыкка килгән. Билетлар тикшерү өчен турникетлар, эскалатор һәм инвалид коляскалары өчен лифтлар куелган.