Актаныш һаман яңара

13 августта Татарстан Республикасы Президенты М.Ш.Шәймиев Актаныш районы үзәгендә ТР Элемтә министрлыгы "Татарстан почтасы" идарәсенең почта элемтәсе, "Таттелеком"ның электр элемтәсе үзәкләрен һәм "Актаныш" сәүдә йортын ачуда катнашты.

Президент М.Ш.Шәймиев яна ачылачак объектларга юнәлгәндә үзәк мәйданга җыелган халык белән очрашып сөйләште, хәлләрен сорашты. Ул бигрәк тә картлар һәм балалар яныннан узганда аларга карата үзенең зур ихтирамын күрсәтте. Балалар үзләре дә аны җырлап-биеп каршыладылар.

Һәр ике объектны ачканда да район хакимияте башлыгы, Татарстан халык депутаты Энгель Фәттахов тантаналы мизгелне кереш сүз белән башлап җибәрде.

- Авыл халкының өч проблемасы бар иде, - диде ул. - Беренчесе - газ, аны хәзер тулысынча хәл иттек. Икенчесе - юл. Узган ел 80 миллион сумлык эш башкардык, бу проблема да чишелер. Өченчесе - элемтә. Хәзер бернинди тоткарлыксыз бөтен дөньяга чыгу мөмкинлеге туды.

Татарстан элемтә министры Ринат Җәләлов, актанышлыларны яңа биналары белән котлап:
- Санлы яңа станцияне файдалануга тапшырдык Ул дөнья стандартларына туры килә һәм халыкка 36 төрле хезмәт күрсәтә, - диде.

Татарстан Президенты М.Ш.Шәймиев үзенең якташлары алдында ясаган чыгышында авыл җирендә болай итеп җиһазландырылган телефон станциясенең хәзергә бердәнбер булуы турында әйтеп узды. Халыкка элемтә, мәгълүматлаштыру хезмәте күрсәтү буенча 2002-2007 елларга дәүләт программасы кабул иттек, - диде ул. - Татарстанда кеше кайда гына яшәсә дә, ул теләсә кайсы ил белән төрле чаралар аша бәйләнешкә керә алырга тиеш. Мәктәпләрне компьютерлаштырдык. Хәзер аларны сыйфатлы итеп Интернетка тоташтыру мөмкинлеге туды.
Бу мәсьәләдә Актаныш - беренче карлыгач. Мәгълүматлаштыру чараларын Россиядә беренчеләрдән булып югары технология җиһазлары белән тәэмин итә алдык.

Президент М.Ш.Шәймиев республикада авыл хуҗалыгы эшләренең барышы белән дә таныштырды. Татарстанда мул иген өлгерүе, ашлык сатып алу бәяләренең артуы, якын араларда халыкка ипи сату бәяләренең артмаячагы турында сөйләде. Аннан соң ул актанышлыларны Чаллы шәһәре хакимияте башлыгына тәкъдим ителәчәк "КамАЗ" ААҖнең генераль директоры урынбасары булып эшләүче Илдар Шәфкать улы Халиков белән дә таныштырды.

Президент М.Ш.Шәймиев Актаныш элемтәчеләренә компьютер бүләк итте. "Таттелеком"ның Актаныш районы электр элемтәсе үзәге берьюлы 2320 абонентка хезмәт күрсәтәчәк. Чынлыкта ул район үзәгендә яшәүчеләрне тулысынча телефон элемтәсе белән тәэмин итә ала.

"Актаныш" сәүдә йорты янында да халык күп җыелган иде. Монда буш ятучы элекке универмагка заманча ремонт үткәреп, "Актаныш" сәүдә йорты итеп үзгәртеп корганнар.

- Бу бинада 1974 елда универмаг ачкан идек инде, - диде Президент М.Ш.Шәймиев. - Заманалар үзгәрә, хәзер менә шунда ук супермаркет ачабыз, сәүдә белән шөгыльләнергә теләүчеләргә эш шартлары тудырабыз.

Супермаркет 1684,4 квадрат метр мәйданны били. Ике катына да тулысынча реконструкция үткәрелгәннән соң ук 44 эшмәкәргә сәүдә урыны арендага тапшырылган.

Ике объектта да керү юлына аркылы тартылган ал тасманы Президент М.Шәймиев, элемтә министры Р.Җәләлов, район хакимияте башлыгы Э.Фәттахов кисте.