Татарстанда 2007 ел - Хәйрия елы дип игълан ителә

16 октябрь көнне Казанда "Җәмгыят-Бизнес-Хакимият: Хәйрия эшчәнлеген үстерүгә көчләрне берләштерү" исеме астында форум ачылды. Аның пленар утырышында Татарстан Президенты Минтимер Шәймиев, РФ Президентының Идел буе федераль округындагы Тулы вәкаләтле вәкиле урынбасары Владимир Зорин, Татарстан Премьер-министры Рөстәм Миңнеханов, Дәүләт Советы рәисе урынбасары Римма Ратникова, Казан шәһәре мэры Илсур Метшин, РФ Дәүләт Думасы һәм ТР Дәүләт Советы депутатлары, иҗтимагый оешмалар җитәкчеләре, төрле дин әһелләре, Мәскәү өлкәсе һәм Идел буе федераль округына кергән төбәкләрнең вәкилләре катнашты.
Форумны оештыру комитеты рәисе, ТР Премьер-министры урынбасары Равил Моратов, утырышны ачып, хәйрия эшчәнлеген үстерү хәзерге җәмгыятьнең иң мөһим проблемаларының берсе булуын ассызыклады. "Социаль әһәмияткә ия мәсьәләләрне чишү, мәрхәмәтлелек, меценатлык һәм волонтерлык идеяләрен үстерү, хәйрия эшчәнлегенең уңышлы тәҗрибәләрен таратуда җәмгыять, хакимият һәм бизнес структураларының берләшеп, бу өлкәдә нәтиҗәле эшләүләрен сорый", - ди Равил Моратов. Һәм бүгенге җыелышуның максаты да шуннан гыйбарәт.

Форумда катнашучыларны сәламләп, Татарстан Президенты Минтимер Шәймиев бүгенге чараны "Изге эшләр эшләүчеләр Җыены" дип атады. "Шулай да ничек кенә атасак та изгелекләр эшләүчеләрнең гамәлләре кемнеңдер кушуы буенча түгел, чын күңелдән, чын йөрәктән башкарыла. Җәмгыять үсеше, алга китешендә һәрвакыт проблемалар булды һәм булыр да. Инде алга китеш чорында без изге эшләр кылу өчен өлгереп җиттек", - ди Президент. Һәм изге эшләргә старт биреп, 2007 елны Татарстанда Хәйрия елы дип игълан итү турында тәкъдим белән чыкты. Илбашы шулай ук үз чыгышында хәйрия эшчәнлегенең тарихы зур булуын, моннан 100 еллар элек үк инде мохтаҗлар өчен приютлар, хастаханәләр ачылуын һәм гасырлар буе аларның халыкка хезмәт күрсәтеп килүен ассызыклады. "Ярдәм итүнең нинди генә формалары юк. Бары тик теләк кенә булсын. Мисал өчен, "Тузган торакны бетерү" буенча ТР Президенты программасы. Заманында республиканың һәр предприятиесе аны гамәлгә ашыру өчен үз керемнәренең 1 процентын фондка күчереп барды. Масштаблы программаның нәтиҗәсе күз алдында. Бу онытыла торган гамәл түгел, бу - изге эш", - диде Минтимер Шәймиев анда катнашучыларга рәхмәтен белдереп. Хәзер исә республикада социаль ипотека буенча "Һәркем ала алырлык торак" программасы гамәлдә. Һәм аны тормышка ашыру да изге эшләрнең дәвамы булырга тиеш. Минтимер Шәймиев республикада изге гамәлләр кылучыларның исемнәре беркайчан да онытылмаячагын һәм аларның үзләре өчен дә зур горурлык булачагын искәртә. Аерым шәхесләргә тукталып, ул, танылган хәйрияче Әсхәт Галимҗановны аерым атап узды. "Әсхәт кебек кеше дөньяда юктыр. Изге эш эшли торган изге кеше ул Әсхәт Галимҗанов. Республикада аңа үзе исән чагында ук һәйкәл куяргә кирәк". Шулай ук Президент Минзәләдән Николай Михайлов, "Татнефть", "Түбән Кама нефтехим" предприятиеләре, "Таттрансгаз" башлыгы Рәфкат Кантюков, "Бәхетле" компаниясе җитәкчесе Мөслимә Латыйпова һәм тагын бик күпләрнең исемнәрен, алар кылган изгелекләрне телгә алды.

РФ Президентының Идел буе федераль округындагы Тулы вәкаләтле вәкиле урынбасары Владимир Зорин форумда катнашучыларга Президент вәкиле Александр Коноваловның сәламен җиткерде.