Минтимер Шәймиев Владимир Путинга Татарстанда иске нефть скважиналарындагы эксперимент турында сөйләде

Татарстанда югары катламнары эшкәртелгән чыганаклардагы нефть скважиналарында эшләү буенча эксперимент башлана. Бу хакта Россия Президенты Владимир Путин белән очрашуда республика башлыгы Минтимер Шәймиев белдерде, дип хәбәр итә ТР Президенты матбугат хезмәте.

Татарстан Президенты билгеләп үткәнчә, республикада углеводородның күзәтелгән һәм расланган запаслары - 2 миллиард тонна, ә фаразланганы 2-8 миллиард тонна тәшкил итә. Аның сүзләренә караганда, ахыргача эшкәртелеп бетмәгән скважиналарны үзләштерү "чыгымнар таләп итсә дә, бүген үк бу эшнең табыш китерәчәге турында әйтергә мөмкин".

Республика башлыгы шулай ук Татарстан икътисадында өстенлекле тармакларының берсе итеп нефть эшкәртү сайланганлыгын билгеләп үтте. Шуңа бәйле рәвештә республикада икенче (Түбән Кама комбинатыннан соң) эре нефть эшкәртү комплексы проектын гамәлгә ашыру башлана. Проектның бәясе - 3 миллиард доллардан артык. "Без барлык тендерларны да үткәрдек, мәйданчык әзерләнгән", - дип ышандырды дәүләт башлыгын Минтимер Шәймиев. Ул шулай ук аның Россиядә бензин, дизель ягулыгы һәм керосин җитештерүче һәм Ауропа кулланучыларының иң югары стандартларына җавап бирүче тәүге завод булачагын ассызыклады.

Моннан тыш, шушы көннәрдә Түбән Кама комбинатында өч яңа цех сафка бастырылды: 1 миллион тонна бензин җитештерүгә исәпләнгән предприятие; 180 мең тонна пропилен чыгару цехы һәм газ концентраты эшкәртү заводы. Соңгысы 2008 елга югары технологияләр нигезендә 1,25 миллион тоннага кадәр полиэтилен җитештерәчәк. Хәзерге вакытта әлеге предприятиенең җитештерүчәнлеге 400 мең тонна полиэтилен тәшкил итә.

М. Шәймиев сүзләренә караганда, республика икътисады үсешенең 20 проценттан артыгын инновацион һәм югары технологик производстволар, аерым алганда машина төзелеше тәшкил итә.

Барыннан да элек, әлеге югары күрсәткечләрне "КАМАЗ" тәэмин итә, дип билгеләп үтте республика башлыгы. 7 меңгә якын машина экспортка җибәрелгән инде. "Моннан тыш, без Казахстанда завод ачабыз", - дип белдерде М.Шәймиев. Ул шулай ук "Северсталь"нең Татарстанда "Ока" машиналары урынына Корея җиңел автомобильләрен җитештерә башлавын билгеләп үтте. Шундый 1,5 мең машина сатылган инде.

Тугыз айдагы икътисади үсеш нәтиҗәләрен чыгарып, Татарстан Президенты: "Икътисади үсеш күрсәткеченең барлык юнәлешләр буенча да планныкыннан алда барачагына ышанычыбыз зур", - дип ассызыклады.

Президентлар спорт эшләре турында да сөйләшеп алдылар. Билгеле булганча, Казан 2011 елда үзендә Бөтендөнья студентлар универсиадасын үткәрү хокукын яуларга ниятли. "Казанның меңьеллыгын бәйрәм иткәннән соң кыюланып киттек. Көчебезне сизеп, шундый заявка бирергә булдык", - дип тә белдерде М.Шәймиев РФ Президентына. Минтимер Шәрипович әйтүенчә, сайлап алуның инде берничә этабы узган, һәм Казан төп биш дәгъвачы арасында. Дәгъвачылар арасында Кытай, Польша, Испания шәһәрләре һәм Тайвань бар. "Өметләнергә була, дип уйлыйм. Мөмкинлекләребезне әйбәт беләбез - барысын да, шул исәптән 2011 елга кадәр олимпия авылын төзүне дә хәл кыла алачакбыз", - дип белдерде М.Шәймиев.

ТР Президенты матбугат үзәге хәбәр иткәнчә, РФ Президенты соравына җавап биреп, М. Шәймиев, әлеге универсиаданы үткәрүгә хокук алган шәһәр исеме быелның 26 гыйнварында игълан ителәчәк, дип искәртте. "Казанны без әйбәт кенә тәкъдир итеп, сайлап алуның беренче этабын үттек", - диде Татарстан Президенты.