Минтимер Шәймиев Идел буе федераль округының “Коррупциягә каршы көрәш проблемалары турында” фәнни-гамәли конференциясендә катнашты

14 ноябрь көнне Татарстан Республикасы Президенты Минтимер Шәймиев, Казан ярминкәсе Баш павильонының Ак залында “Коррупциягә каршы көрәш проблемалары турында” Идел буе федераль округының фәнни-гамәли конференциясендә катнашты.

Түгәрәк өстәл утырышында Россия Федерациясе Президентының Идел буе федераль округындагы Тулы вәкаләтле вәкиле Александр Коновалов, Дәүләт Думасының куркынычсызлык буенча комитеты рәисенең беренче урынбасары, коррупциягә каршы тору буенча комиссия рәисе Михаил Гришанков, Россия Федерациясе Генераль Прокуроры урынбасары Сергей Герасимов, ИФОда РФ Федераль Куркынычсызлык Советы органнары башлыклары Советы рәисе, Түбән Новгород өлкәсе буенча ФСБ идарәсе башлыгы Олег Храмов, ТР Эчке эшләр министры Әсгать Сәфәров, ТР Прокуроры Кафил Әмиров, РФ һәм ТР коррупциягә каршы көрәш юнәлешендәге министрлыклар һәм ведомство җитәкчеләре, башкарма, закон чыгаручы һәм суд хакимияте вәкилләре, коррупциягә каршы эшчәнлек өчен җаваплы башка хезмәткәрләр катнашты.

Александр Коновалов, кереш сүзендә, коррупция проблемасының яшәешебездәге күп кенә уңай процессларга аяк чалуын һәм тоткарлыкларның сәбәпчесе булуын ассызыклады. “Коррупция проблемасының тискәре күренеш булуын аңлый барган саен, тормышыбызның төрле өлкәләрендә ул тагын да кискенрәк чагылыш табуын дәвам итә, ул барлык даирәләргә дә акрынлап үрмәли бара”, - ди ул.

Минтимер Шәймиев исә, коррупциянең халык күңеленә тигән, җәмгыятьнең иң борчулы мәсьәләләренең берсе булын ассызыклады. Коррупция күренешләре чәчәк атуына нокта куюда мөһим юнәлешләрнең берсе, республика җитәкчесе фикеренчә, бу проблемага көрәшне илкүләм дәрәҗәдә җәелдерү, юкса көтелгән нәтиҗәләргә ирешү икеле.

Конференциядә, Татарстанда коррупция чагылышларын юкка чыгару максаты белән кабул ителгән күп кенә чаралар турында сүз барды. Алар, “Татарстан Республикасында коррупциягә каршы тору турындагы” закон, Коррупциягә каршы сәясәтне тормышка ашыру буенча Республика советы, ТР Президенты каршында коррупциягә каршы көрәш сәясәте бүлеге эшчәнлеге җимешләре һәм башкалар. Конференциядә катнашучылар әйтүенчә, коррупция белән көрәшү эшендә Татарстанның тәҗрибәсе башка төбәкләрдә генә түгел, тулаем федераль дәрәҗәдә дә кыйммәтле.