Минтимер Шәймиев: "Менделеевскидагы яңа химия комплексы уңыш казаначак"

17 октябрьдә Татарстан Президенты Минтимер Шәймиев Менделеевскида аммиак, метанол, грануллы карбамид һәм аммиак селитрасы җитештерү заводы төзелешен ачу һәм нигезенә капсула салуга багышланган тантаналы чараларда катнашты.

Тантанада шулай ук ТР Премьер-министры Рөстәм Миңнеханов, "Внешэкономбанк" дәүләт корпорациясе рәисе Владимир Дмитриев һәм "Mitsubishi Heavy Industries" корпорациясенең (Япония) Мәскәү вәкиллеге башлыгы Ито Дзюн катнашты.

"Миңа бүген монда булуы зур канәгатьлек хисләре бирә. 2012 елга бу зур проект гамәлгә ашырылыр дип ышанам". - дип билгеләп үтте Владимир Дмитриев. Аның сүзләренә караганда, мондый уникаль проектлар Россиядә соңгы 30 елда гамәлгә ашырылмаган.

Внешэкономбанкның өстенлекле юнәлеше - яңа эш урыннары, өстәмә кыйммәт бирүче һәм территорияләргә үсәргә ярдәм итүче яңа производстволарга ярдәм күрсәтү. Ито Дзюн сүзләренчә, "Mitsubishi Heavy Industries" корпорациясе, дөнья финанс кризисына карамастан, Менделеевскидагы проектны уңышлы гамәлгә ашыру өчен бөтен көчен куячак.
"Хөрмәтле Менделеевски халкы, бүген биредә сезнең шәһәр һәм Татарстан өчен генә түгел, ә бөтен ил өчен истәлекле вакыйга", - дип билгеләп үтте Татарстан Президенты Минтимер Шәймиев. ТР Илбашы сүзләренчә, төзелеш башлану бөтен дөньяга Россиянең хәтта кризис шартларында да яңа производстволар төзүне дәвам итүен күрсәтә. "Бу безнең дәүләтнең көче хакында сөйли", - дип ассызыклады М.Шәймиев.

Республика башлыгы билгеләп үткәнчә, яңа химия комплексы продукция җитештерүгә сарыф ителгән энергия чыгымнары буенча 1,7 тапкыр экономиялерәк булачак, бу завод газны дөнья бәяләре буенча кулланганда да көндәшлеккә сәләтен югалтмаячак.

Минтимер Шәймиев Россия Федерациясе Хөкүмәтенә, Внешэкономбанкка һәм Япония компаниясенә шушы проектка ярдәм күрсәткәннәре өчен рәхмәт белдерде. "Яңа производствоның экологик яктан чиста булуы бик мөһим. Менделеевски өстендә чиста күк йөзе булырга тиеш", - дип ассызыклады республика лидеры.

ТР Президенты тагын ике мөһим моменты билгеләп үтте. Беренчесе - яңа комплекс Татарстанның агросәнәгатен кирәкле ашламалар белән тәэмин итәчәк: республика 300 мең тоннага якын минераль ашламадан файдалана. 2008 елда республика басуларында рекордлы уңыш җыеп алында. "Мондый уңыш басуларга ашламалар кертмичә генә мөмкин түгел, - диде ТР Президенты. - Икенчесе - заводта чыгарыла торган метанол нефть химиясе ихтыяҗларына тотылачак.
Болар барысы да яңа проектны уңышка дучар итә. Сезгә уңышлар телим. Без булдырабыз!"

Рәсми тантанадан соң комплексның нигезендә киләчәк буыннарга юлламалы капсула салынды.
Проектның төп инвесторлары - ТР Инвестиция-венчур фонды йөзендә ТР Хөкүмәте һәм Внешэкономбанк. Проектның гомуми бәясе - 1,5 млрд. АКШ доллары. Гамәлгә ашыру вакыты - 2012 елның I кварталында сафка бастыруны күздә тотып, 36 ай.