Татарстан милициясе кадрларын әзерләүче институт 35 еллыгын билгеләп үтә

21 март көнне Россия Федерациясе Эчке эшләр министрлыгының Казан юридик институты коллективы вузның 35 еллыгын билгеләп үтә.

РФ Эчке эшләр министрлыгының Казан юридик институтындагы бәйрәм тантанасында ТР буенча эчке эшләр министры Әсгать Сәфәров, Мари Эл Республикасы эчке эшләр министры Артем Хохорин, ТР Министрлар Кабинеты Аппаратының административ һәм хокук саклау органнары идарәсе җитәкчесе Александр Вайда, РФ Юстиция министрлыгының ТР буенча идарәсе җитәкчесе Наил Сафиуллин, ТР Конституция суды рәисе Виктор Демидов, ТР Куркынычсызлык советы секретаре Венер Сәлимов, ТР буенча эчке эшләр министры киңәшчесе Рафил Ногъманов, Россия Эчке эшләр министрлыгының Казан юридик институты җитәкчесе Фоат Зиннуров, институт курсантлары, республиканың эчке эшләр органы хезмәткәрләре һәм ветераннары катнашты.

Фоат Зиннуров үз чыгышында: “Безнең уку йортының уңышлы эшчәнлек алып бара башлавына 35 ел булды. Милиция кадрларын әзерләүче вуз бай матди-техник базасы һәм көчле укытучылар составы булу нәтиҗәсендә үз дәрәҗәсен саклап калды. ТР Эчке эшләр министрлыгы җитәкчелеге безнең уку йортын тәмамлаучы кадрлар белән канәгать дисәм, ялгышмам, дип уйлыйм. Бу елларда безнең тарафтан 7 меңнән артык белгеч әзерләнде, аларның 5 меңе югары юридик белемле. Беркайчан да ирешелгән уңышлар белән тукталып калырга ярамый, Татарстан милициясе хезмәткәрләренә булган таләпләр көн саен арта гына, шуңа күрә укыту процессында кайбер үзгәрешләр булырга мөмкин. Аерым алганда, 2013 елда Универсиада үткәрелү сәбәпле, милиция хезмәткәрләренә чит телләр өйрәтүгә зур игътибар биреләчәк”, - диде.

ТР буенча эчке эшләр министры Әсгать Сәфәров барысын да юбилей белән котлады, фән һәм педагогика эшчәнлегендә уңышлар теләде.

Татарстан Эчке эшләр министрлыгы җитәкчесе котлау сүзеннән соң Россия Эчке эшләр министрлыгы Казан юридик институтының укытучылар составына дәүләт һәм ведомство бүләкләрен тапшырды.

Милиция подполковнигы, Эчке эшләр бүлегенең административ эшчәнлек һәм идарә кафедрасы өлкән укытучысы Гадел Сөләйманов РФ Эчке эшләр министрлыгының Мактаулы грамотасы белән бүләкләнде.

Милиция полковнигы, кафедра мөдире Марат Гарәфетдинов, милиция полковнигы, институт ϰҗитәкчесенең хокукый эшләр буенча ярдәмчесе Елена Долгополова, милиция полковнигы, читтән торып уку бүлеге җитәкчесе Рөстәм Насыйров “Данлы хезмәте өчен” медале белән бүләкләнде.

Милиция подполковнигы, икътисади теория, хокукый статистика, математика һәм информатика кафедрасы профессоры Гөлнара Һадиуллина “Эчке эшләр министрлыгының Мактаулы хезмәткәре” дигән күкрәк билгесенә ия булды.



Бәйрәм тантанасын Россия һәм Татарстанның халык артисты Венера Ганиева, “Иволга” балалар ансамбле, “Сәйдәш” бию ансамбле һәм Татарстан республикасы буенча Эчке эшлр министрлыгының “Хорошее настроение” ансамбле чыгышлары тагын да ямьләндерде. Курсантлар да кунаклар өчен бәйрәм программасы әзерләгән иде.

Традиция буенча бәйрәм концерты институт гимны белән тәмамланды.