ТР Сәнәгать һәм сәүдә министрлыгы коллективына яңа министр тәкъдим ителде

20 мартта ТР Премьер-министры Рөстәм Миңнеханов ТР Сәнәгать һәм сәүдә министрлыгы коллективына яңа министр Равил Зароповны тәкъдим итте һәм элеккеге министр Александр Когогинга башкарган эше өчен рәхмәт белдерде. Бу хакта ТР Сәнәгать һәм сәүдә министрлыгының матбугат хезмәте хәбәр итә.

Коллективка министрны тәкъдим итеп, Рөстәм Миңнеханов яңа җитәкчене болай сыйфатлады: "Равил Зарипов - кризис шартларында эшләү тәҗрибәсе булган профессиональ җитәкче".

ТР Премьер-министры министрлык һәм яңа министр алдында торган бурычларны билгеләде. "Кризис чорында бурычлар тагын да катлаулырак - производствоны, эш урыннарын саклап калырга кирәк. Сәнәгать предприятиесендә хезмәт куючы белгеч берничә ай дәвамында тәҗрибә туплый, тупланган потенциалны югалтмаска кирәк. Өстәмә кыйммәт банкларда түгел, предприятиеләрдә башкарыла. Сәнәгать производствосы - икътисадның нигезе", - дип ассызыклады ул.

Рөстәм Миңнеханов Александр Когогинга башкарган эше өчен рәхмәт белдерде. "Җитештерүдә хезмәт куючы Когогинны җитәкче эшенә чакыру минем идея иде. Александр Когогин эшкә күп яңалыклар кертте. Ул үзе дә күп нәрсәгә өйрәнде. А.Когогин безнең командада хуҗалык эшендә хезмәт куячак", - дип хәбәр итте Премьер. Александр Когогин, үз чиратында, ТР Премьер-министрына күрсәткән ышанычы өчен рәхмәт белдерде. "Миңа башкарган эшем өчен оят түгел. Министрлык коллективына нәтиҗәле уртак эшебез өчен зур рәхмәт. Без бергәләп яңа министрлык - Сәнәгать һәм сәүдә министрлыгы оештырдык, аның эш сыйфатын даими яхшыртып тордык.

Министрлык республикада беренчеләрдән булып ИСО 9001:2000 сыйфат сертификаты алды. Әмма бу сыйфатны арттыру буенча эшнең башы гына. Хәзер бу яңа министрга бәйле булачак", - диде ул.

Равил Зарипов ТР Президенты һәм ТР Премьер-министрына күрсәткән ышанычлары өчен рәхмәт белдерде. "Мин үз алдыма нәтиҗәле эшләү бурычын куям. Министрлык тарафыннан күп нәрсә эшләнде инде, мин аларны сакларга һәм арттырырга тырышачакмын", - диде яңа министр.

ТР Премьер-министры Равил Зариповка яңа эшендә уңышлар теләп, министрлык коллективына характеристика бирде. "Татарстан Сәнәгать һәм сәүдә министрлыгында үз эшенең осталары хезмәт куя, министрның барлык урынбасарлары да һөнәри һәм оештыру эшендә зур мәктәп узды", - дип билгеләп үтте Рөстәм Миңнеханов.