Р.Миңнеханов: "Республика активлары ышанычлы кулларда булырга тиеш"

Берничә көн элек ТР Президенты Указы нигезендә Азат Хамаев ТР Җир һәм мөлкәт мөнәсәбәтләре министры итеп билгеләнгән иде. 20 мартта Премьер-министр Рөстәм Миңнеханов яңа министрны коллективка тәкъдим итте.

Азат Хамаевны коллектив өчен яңа кеше дип әйтеп булмый. Биредә 3 ай дәвамында министрның беренче урынбасары булып эшләү дәверендә ул үз кешегә әйләнгән инде. Азат Хамаев бу постта Валерий Васильевны алмаштырды. Элеккеге министр хәзер дүртенче чакырылыш Татарстан Дәүләт Советы депутаты, парламентның Экология, табигатьтән файдалану һәм аграр мәсьәләләр комитеты рәисе. "Ул кайда гына эшләмәсен, һәрвакыт системалы эш алып барды, үрнәк булды. Без аңа уңышлар телибез", -ди Премьер-министр.

Хөкүмәт рәисе белдергәнчә, Җир һәм мөлкәт мөнәсәбәтләре министрлыгы бик үзенчәлекле һәм анда эш бик катлаулы. Биредә республиканың барлык активлары саклана. Шуңа күрә анда әзерлексез кешеләр килә алмый. Бу яңа министрга зур җаваплылык өсти. Рөстәм Миңнеханов фикеренчә, зур тормыш мәктәбе узган, икътисадның реаль секторында эшләгән, кайчандыр Дәүләт Думасы депутаты булган Азат Хамаев бу җаваплылыкны алырга әзер кеше. "Министр Татарстан мәнфәгатьләре өчен хезмәт итәргә тиеш. Иң мөһиме: республика активлары ышанычлы кулларда булырга тиеш", -дип белдерде Премьер. Ул белдергәнчә, палаталар, муниципалитетлар белән эшләү, министрлык алдында өстенлекле юнәлеш булып кала. Хөкүмәт рәисе яңа җитәкчегә уңышлар теләде.

Азат Хамаев, үз чиратында, үзенә ышаныч белдергән өчен ТР Президенты һәм Хөкүмәтенә рәхмәт сүзләре җиткереп, аны акларга вәгъдә бирде. "Республиканың җир һәм мөлкәт ресурсларын сакчыл тотарга, хокук саклау органнары һәм халык тарафыннан дәгъвалар булмасын өчен тырышырга йөкләмә алам. Министрлык алдына куелган бурычларны үтәр", -дип ышандырды яңа җитәкче.