ТР ТКХны реформалаштыруга ярдәм күрсәтү фондыннан капремонтка 4,71 млрд. сум акча алды

25 февраль көнне ТР Министрлар Кабинетында 2008 елның 15 апрелендә Татарстан Республикасы һәм Торак–коммуналь хуҗалыгын реформалаштыруга ярдәм күрсәтү фонды арасында төзелгән килешүгә кул куелды. Аның нигезендә, республика Фондтан 2009 елда ТР территориясендә күпфатирлы йортларны капиталь ремонтлауга 4,71 миллиард сум акча алачак.

Документны Татарстан Республикасы Президенты Минтимер Шәймиев һәм “Торак–коммуналь хуҗалыгын реформалаштыруга ярдәм күрсәтү фонды” дәүләт корпорациясе генераль директоры Константин Цицин имзалады.

Татарстан Россия төбәкләре арасында беренчеләрдән булып 2008 елда үткәрелгән капиталь ремонтның нәтиҗәләре турында хисап тотты һәм 2009 елга заявка бирде. Бүген исә Торак–коммуналь хуҗалыгын реформалаштыруга ярдәм күрсәтү фонды РФ төбәкләре арасында иң беренче булып Татарстан белән 2009 елда капиталь ремонт программасын финанслау турындагы килешүне имзалады.

2009 елда Татарстан Республикасында торак йортларны капиталь төзекләндерү программасын финанслау күләме 9,7 миллиард сум тәшкил итә, шуның 4,7 миллиарды – фонд, 3,45 миллиарды – республика бюджеты, 1,1 миллиарды – җирле бюджетлар, 486 миллион сумы милекчеләрнең акчалары. Гомуми мәйданы 7,9 миллион квадрат метр тәшкил иткән 2 мең 344 күпфатирлы йортта капиталь ремонт үткәрү күздә тотыла. Килешүгә кул куйганнан соң, Казанга рәсми визит белән килгән Россия Федерациясе Хөкүмәте Рәисе урынбасары Дмитрий Козак журналистларга 2009 елда Татарстанда торак фондын капиталь төзекләндерү программасы Россия төбәкләре арасында иң киң колачлысы, дип белдерде. Дөньядагы финанс кризисына да карамастан, Торак–коммуналь хуҗалыгын реформалаштыруга ярдәм күрсәтү фонды тарафыннан 2009 елда күпфатирлы йортларны капиталь ремонтлау программасын финанслау күләме кимемәячәк.

Минтимер Шәймиев ассызыклап үткәнчә, Татарстанда 2008 елда гамәлгә ашырылган һәм быел киң колач белән дәвам итәчәк торак йортларны капиталь ремонтлау программасы гаять зур әһәмияткә ия – аның аркасында кешеләр үзләренең торак шартларын яхшырта. Бер үк вакытта ул кризиска каршы программа ролен дә үти – төзелеш тармагында күп кенә эш урыннары булдыра. Республика капиталь ремонтка зур күләмдә бүлеп бирелүче акчаларны үзләштерергә әзер.

Искәртеп узабыз, күпфатирлы йортларны капиталь төзекләндерү программасын ике ел дәвамында гамәлгә ашыру нәтиҗәсендә Татарстанда ремонтка мохтаҗ фатирларның 30 проценты төзекләндереләчәк, ә аларда гомер итүче гаиләләр үзләренең яшәү шартларын сизелерлек яхшыртачак.