ТР Мәгариф һәм фән министрлыгы коллективына яңа җитәкчесе тәкъдим ителде

20 мартта Татарстан Премьер-министры Рөстәм Миңнеханов ТР Мәгариф һәм фән министрлыгы коллективына яңа министр - Альберт Гыйльметдиновны тәкъдим итте. Чарада шулай ук ТР Президенты Аппараты җитәкчесе Юрий Камалтынов катнашты.

Татарстан Мәгариф һәм фән министрлыгын ике ел чамасы җитәкләгән Наил Вәлиев дүртенче чакырылыш ТР Дәүләт Советы депутаты итеп сайланды, ул ТР Фәннәр академиясендә вице-президент сыйфатында эшләвен дәвам итәчәк. ТР Президенты Указы нигезендә, 2008 елга кадәр ТР мәгариф һәм фән министры урынбасары вазифасын башкарган, Казан дәүләт университетының гомуми физика кафедрасы профессоры Альберт Гыйльметдинов яңа министр итеп билгеләнде.

Татарстан Мәгариф һәм фән министрлыгы коллективына беренчеләрдән булып ТР Хөкүмәте башлыгы Рөстәм Миңнеханов мөрәҗәгать итте. Р.Миңнехановның сүзләренә караганда, ТР Президенты республика Мәгариф һәм фән министрлыгы алдына бик җитди бурычлар куя.

"Яңа шартларда эштә яңа алымнар, инновацияләр кулланучы, алдынгы карашлы кеше кирәк, - диде Рөстәм Миңнеханов. - Казан дәүләт университетында, чит илдә эшләгән чорда Альберт Харис улы туплаган тәҗрибә бик тә ярап куячак. Ул чит илдә үз мөмкинлекләрен күрсәтүгә ирешкән бик әзерлекле кеше. Әлеге сыйфатлар республикада мәгарифне сыйфат ягыннан яңа дәрәҗәгә күтәрергә мөмкинлек бирер дип уйлыйм". Татарстан Хөкүмәте башлыгы ТР Мәгариф һәм фән министрлыгы коллективы, яңа министр алдына бик җитди бурычлар куелуын искәртте. Аерым алганда, бу - киң колачлы Президент программасын эшләү, "ул якын киләчәктә ТР Мәгариф һәм фән министрлыгының гына түгел, ә Хөкүмәт, республика җитәкчелегенең эшендә дә өстенлекле юнәлеш булачак".

ТР Мәгариф һәм фән министрлыгының элеккеге башлыгы турында сөйләгәндә, Рөстәм Миңнеханов Наил Вәлиевнең ике елга якын республика мәгариф системасын җитәкләвен, ә хәзер депутатлар корпусын ныгытачагын һәм Фәннәр академиясендә эшләвен дәвам итәчәген ассызыклады. "Бу аңа мәгариф системасында эшләгән елларда туплаган фәнни юнәлешләрен һәм тәҗрибәсен гамәлгә ашырырга мөмкинлек бирәчәк", - диде Премьер. Рөстәм Миңнеханов элеккеге министрга яңа эшендә уңышлар теләде һәм чәчәк букеты тапшырды.

Үз чиратында, Наил Вәлиев министрлыкта бүгенге мәгариф системасы алдына куелган бурычларны хәл итәргә сәләтле яхшы, оешкан команда туплануын билгеләп үтте. Ул ТР Фәннәр академиясе һәм Татарстан Мәгариф һәм фән министрлыгы үзара аерылгысыз бәйләнгән булуын искәртте һәм бергәләп эшләүнең нәтиҗәле юлларын табачакларына ышаныч белдерде.

"Мин Президент һәм Премьер-министрга күрсәткән ышанычлары өчен рәхмәт белдерәм, - диде Альберт Гыйльметдинов. - Әмма бу әле зур җаваплылык та. Әлеге тармакның кешеләр тормышы өчен никадәр мөһим икәнлеген яхшы беләм. Шулай булгач безнең алда зур бурычлар тора".