"Хьюлетт-Паккард" компаниясе Татарстан белән хезмәттәшлеген киңәйтә

25 февраль көнне ТР Министрлар Кабинетында Премьер-министр Рөстәм Миңнеханов “Хьюлетт-Паккард” компаниясе (АКШ) генераль директоры Оуэн Кристофер Кемп белән очрашты. Анда шулай ук ТР икътисад министры Марат Сафиуллин, мәгълүматлаштыру һәм элемтә министры Фәрит Фазылҗанов, ТР Мәгълүмат технологияләре үзәге генераль директоры Николай Никифоров, Министрлар Кабинетының мәгълүмат-аналитика бүлеге җитәкчесе Александр Юртаев һ.б. катнашты, дип хәбәр итә Министрлар Кабинетының матбугат хезмәте.

Татарстан Хөкүмәте җитәкчесе белдергәнчә, масштаблы бурычларны хәл итү өчен республиканың стратегик партнерлары арасында дөнья күләмендә танылган җитди компанияләр булу мөһим. Аның сүзләренчә, “Хьюлетт-Паккард” бүген республиканың шундый ышанычлы партнерларының берсе. Премьер-министр әлеге компания белән хезмәттәшлекнең төп юнәлешләрен ассызыклап үтте. Алар, беренче чиратта, дәүләт, сәнәгать һәм иҗтимагый секторларда, мәгариф һәм белгечләр әзерләү өлкәләрендә мәгълүмат технологияләрен үстерү һәм кулланудан гыйбарәт. Шулай ук “Хьюлетт-Паккард”ның Казанда төзелүче IT-парк һәм Универсиадага әзерлек белән бәйле проектларда катнашуы турында сүз бара.

Оуэн Кристофер Кемп бу проектлар белән кызыксынуын белдереп, компаниянең алга таба да Татарстан белән хезмәттәшлеген дәвам итәчәген җиткерде. Татарстан вузлары белән эшне киңәйтү кирәклегенә басым ясады.

Билгеле булганча, 2005 елда ТР Хөкүмәте белән әлеге компания арасында мәгълүмат технологияләрен үстерү өлкәсендә ниятләр беркетмәсе имзаланган иде. 2007 елда Казанда “Хьюлетт-Паккард”ның Россия төбәкләрендәге җиденче офисы ачылды. Бүгенге көндә компаниянең Россиядә 11 вәкиллеге эшли.

“Хьюлетт-Паккард” хәзер Татарстанда “Татнефть”, “Казаноргсинтез”, “Түбән Кама нефтехим” ААЌ кебек эре сәнәгать предпряитиеләре белән уртак проектларны тормышка ашыра. “ТР Электрон Хөкүмәте” проектын гамәлгә ашыруда да әлеге компания җиһазлары һәм программалары кулланыла.