«Парклар маршы-2009» конкурсы 15 нче тапкыр игълан ителде

Россия һәм аңа чиктәш илләрдә үткәрелә торган конкурс кысаларында ТР Экология һәм табигать ресурслары министрлыгы балалар арасында 3 конкурс игълан итте.

"Тыюлыктагы табигать дөньясы" дип аталганы балалар рәсемнәре конкурсы булып, аңа республика территориясендәге аеруча сакланыла торган табигать һәм анда яшәүче тереклек ияләре сурәтләнгән рәсемнәр кабул ителә. Министрлык үзенең сайты аша хәбәр иткәнчә, әлеге конкурс республика күләмендә үткәрелә, алга таба, рәсемнәр сайлап алынганнан соң, Бөтенроссия конкурсына җибәрелергә дә мөмкин. Шуңа күрә, министрлык оештыручыларга мөрәҗәгать итеп, катнашучыларның күп булачагы, димәк, көндәшлекнең зурлыгы хакында искәртә һәм "йомшаграк" хезмәтләрне җибәрмәүләрен, иң яхшыларын Казанга заказниклар хакимиятләре, территориаль идарәләре аша үзәкләштереп, 11 майга кадәр юллауларын үтенә. Ә сайлап алынган иң уңышлы эшләр Кеше аягы тимәгән табигатьне саклау үзәгендә тупланылачак.

"Лукоморье" әдәби конкурсының темасы исә табигать хокукларына бәйле. Бу ярышта катнашучыларга аеруча сакланыла торган табигать территориясен сайлап алып, аның хакында әкият, хикәя яки шигырь иҗат итәргә кирәк булачак. Шулай ук дәүләт тарафыннан махсус сакланылмый торган территорияләрне сакланыла торганнары белән чагыштырып, алар арасында аерма бармы-юкмы, булса, авторда нинди фикерләр тууы хакында шәрехләү хуплана. Иң яхшы материаллар министрлык басмаларында дөнья күрәчәк.

"Кеше аягы басмаган табигать уртаулары" фотоконкурсына аеруча сакланыла торган табигать территорияләре тормышыннан хайваннар һәм үсемлекләр дөньясы төшерелгән фотосурәтләр кабул ителә. Конкурста бары тик балалар хезмәтләре генә катнаша ала. Ә инде зурлар үзләренең уңышлары белән уртаклашасылары килсә, аларның фотохезмәтләре "Парклар маршы" фотоархивына кертелергә һәм алга таба министрлык тарафыннан, автор турында мәгълүмат китереп, белем бирү-агарту эшчәнлегендә кулланылырга мөмкин.

Конкурс эшләренә таләпләр, аерым киңәшләр ТР Экология һәм табигать ресурслары министрлыгының сайтында урнаштырылган. Искәртеп үтәбез: узган елны үткәрелгән "Парклар маршы" акциясендә 500 мең кеше катнашкан булган.