Ф.Мөхәммәтшин:“Соңгы елларда ТРның көньяк–көнчыгышында күп кенә игелекле эшләр башкарылды"

24 февраль көнне ТР Дәүләт Советы Рәисе Фәрит Мөхәммәтшин Татарстанның Баулы һәм Ютазы районнарына эш сәфәре кылды.

Баулыда парламент башлыгы Баулы эчке эшләр бүлегенең яңа бинасын ачуда катнашты. “Баулы муниципаль районы” муниципаль берәмлеге башлыгы Альберт Хәбибуллин әлеге тантанада ясаган чыгышында милиция бүлегенең яңа бинасы 2002 елда төзелә башлавын һәм аның ачылышын инде күптәннән көтүләрен ассызыклады. Яңа бинада хезмәт өчен уңайлы шартлар тудырылачак.

“Хөрмәтле Баулы халкы, эчке эшләр бүлеге хезмәткәрләре, кунаклар! Сезнең барыгызны да Ватанны саклаучылар көне белән котлыйм, сезгә ныклы сәламәтлек, хезмәттә уңышлар, бәхет һәм иминлек телим”, – дип мөрәҗәгать итте тантанада катнашучыларга Фәрит Мөхәммәтшин.

Ул милиция бүлегенең яңа бинасы нәкъ менә 23 февральдә ачылуы символик мәгънәгә ия, дип билгеләп үтте. Баулы районы Россиянең берничә субъекты белән чиктәш һәм Татарстанның көньяк–көнчыгыш капкасы санала, шунлыктан район милиция бүлеге биредә аерым әһәмияткә ия.

ТР эчке эшләр министры Ђсгать Сәфәров та Баулы халкын яңа бина ачылу белән котлады. Ул Баулы районы һәм шәһәре эчке эшләр бүлеге үз төркемендә беренче урынны алуын билгеләп үтте һәм бүлекнең алга таба да үз позициясеннән чигенмәвен теләде. Ђсгать Сәфәров ТР Эчке эшләр министрлыгы исеменнән Баулы районы һәм шәһәре эчке эшләр бүлегенә автомобиль бүләк итте.

Эчке эшләр бүлегенең яңа бинасы өч катлы, 120 эш урынына исәпләнгән, смета бәясе – 134 миллион сум. Бинада милициянең төп хезмәтләре: кизү часте, вакытлыча тоту изоляторы, тикшерү–оператив чаралар үткәрү, туклану һәм ял, участок инспекторлары бүлмәләре, спорт залы урнашкан.

Кичә Баулыда тагын бер объект – универсаль спорт залы ачылды. Ул теннис, волейбол, баскетбол, милли көрәш белән шөгыльләнү мәйданчыкларын, йөгерү юлын, 200 тамашачыга исәпләнгән трибуна блогын үз эченә ала.

ТР Дәүләт Советы Рәисе яңа бинаны ачу тантанасында әлеге яңа, иркен, якты һәм универсаль залда Баулыда яшәүчеләр спортның күп кенә төрләре белән шөгыльләнә алачагын ассызыклады. Фәрит Мөхәммәтшин Татарстан җитәкчелеге исеменнән яңа комплекска спорт кирәк–яраклары һәм җиһазлар сатып алу өчен 150 мең сумлык сертификат тапшырды.

Федераль казначылык бинасы Баулыда Ватанны Саклаучылар көнендә ачылган өченче объект булды. Ул Татарстан территориясендә федераль бюджет акчаларына типовой проект буенча төзелгән 20нче федераль казначылык бинасы.

Баулы активы белән очрашуда парламент башлыгы Баулы районының социаль–икътисади күрсәткечләренә уңай характеристика бирде һәм дөньядагы икътисади кризиска да карамастан, 2009 елга билгеләнгән барлык бурычларның да үтәләчәгенә өмет белдерде. Төп бурыч – халыкны эш белән тәэмин итү. “Бергәләп без барлык кыенлыкларны да җиңеп чыгачакбыз”, – дип ассызыклады ул һәм Баулы халкын 1 мартта ТР Дәүләт Советына узачак сайлауларда актив катнашырга чакырды.

Көннең икенче яртысында Фәрит Мөхәммәтшин Ютазы муниципаль районында булды, Урыссу бистәсендә төзекләндергәннән соң “Энергетик” район Мәдәният йортын ачу тантанасында катнашты.

“Ютазы муниципаль районы” муниципаль берәмлеге башлыгы Алмас Сәхапов үзенең чыгышында район Мәдәният йортына республика җитәкчелеге ярдәме белән капиталь ремонт үткәрелүен ассызыклады.

Фәрит Мөхәммәтшин соңгы берничә елда Ютазы районы сайлаучыларыннан наказлар алуын, аларда кешеләрнең яраткан Мәдәният йортларын төзекләндерүне сорауларын билгеләп үтте. “Ниһаять, әлеге мәдәни ял һәм иҗат белән шөгыльләнү урыны яңадан үз ишекләрен ачты”, – диде ул һәм район Мәдәният йортында Татарстан һәм Россия Федерациясенең күрше субъектларыннан килгән артистлар тамашачыларны үз чыгышлары белән сөендерүләрен теләп калды. Ф.Мөхәммәтшин республика җитәкчелеге исеменнән Мәдәният йортына музыкаль студия алу өчен 300 мең сумлык сертификат бүләк итте.

“Энергетик” район Мәдәният йортында урнашкан ЗАГС бүлегендә ТР Дәүләт Советы Рәисе Ютазы районында яшәүче 5 гаиләгә ана капиталы алу өчен сертификатлар тапшырды. Ф.Мөхәммәтшин соңгы елларда ана капиталын куллану мөмкинлекләре киңәюен билгеләп үтте.

“Соңгы елларда республиканың көньяк–көнчыгышында күп кенә игелекле эшләр башкарылды, яңа социаль объектлар, мәктәпләр һәм балалар бакчалары, спорт сарайлары һәм йөзү бассейннары ачылды”, – дип белдерде журналистларга ТР Дәүләт Советы Рәисе.

Аның сүзләренә караганда, соңгы 5 елда Ютазы районында чистарту корылмалары сафка баскан, хастаханә төзекләндерелгән.

“Энергетик” район Мәдәният йортында 226 урынга исәпләнгән тамашачы залы, Ютазы районы башкарма комитетының ЗАГС бүлеге, үзәк район китапханәсе, хореография залы урнашкан, музей, кафе, “Бердәм Россия” Бөтенроссия сәяси партиясе җирле бүлегенең иҗтимагый кабул итү бүлмәсе, милиция участок пункты өчен бүлмәләр бүлеп бирелгән.