Казанның Икмәк–кондитер комбинаты алтын медальгә лаек булды

Мәскәүдә дөньяның 37 иленнән 1700дән артык предприятие катнашында узган XVI “Продэкспо–2009” Халыкара күргәзмәсендә “Икмәк–кондитер комбинаты” ААЌ алтын медальгә һәм “Иң яхшы продукт–2009” конкурсының дипломына лаек булды, дип хәбәр итә ТР Сәнәгать һәм сәүдә министрлыгының матбугат хезмәте.

Жюри Икмәк–кондитер комбинаты тарафыннан тәкъдим ителгән продукциянең барлык ассортиментына (вафля, печенье, чәкчәк) югары бәя биреп кенә калмады, әлеге әйберләрне чыгаручы бүлек җитәкчесен дә бүләкләде. “Икмәк–кондитер” комбинаты ААЌнең кондитер цехы башлыгы Лидия Гавриловага (ул әлеге предприятиедә ачылган көненнән, ягъни 1986 елдан бирле эшли) конкурсның лауреаты дипломы һәм “Югары сыйфат өчен” медале тапшырылды. Л.Гаврилова җитәкчелегендә чыгарылучы продукция төрле конкурсларда, шул исәптән “Продэкспо” күргәзмәсендә берничә тапкыр призлы урыннар яулады.

Сүз уңаеннан, узган атнада “Икмәк–кондитер комбинаты” ААЌ хезмәткәрләре өчен тагын бер истәлекле вакыйга булды. Предприятие ИСО 22000 “Азык–төлек продуктларының куркынычсызлык менеджменты системасы” Халыкара стандарты белән тәңгәллеккә сертификация узды.

Комбинатка аудит үткәргән “Русский Регистр” Сертификатлаштыру ассоциациясе экспертлары (Санкт–Петербург) Икмәк–кондитер комбинатында җитештерү югары дәрәҗәдә оештырылуын билгеләп үтте һәм финанс кризисына да карамастан, предприятие алга таба да уңышлы үсеш кичерер һәм яңа үрләр яулар, дигән өмет белдерде.