Казандагы эш урыннары ярминкәсендә эш эзләп 3820 кеше мөрәҗәгать иткән

19 мартта Казанның «Химиклар» мәдәният сараенда үткәрелгән эш урыннары гомумшәһәр ярминкәсенә эш эзләп килгәннәрдән 3820 кеше эш белешкән, нәтиҗәдә, шуларның 389ы эшкә урнашуга юллама алган. Болардан тыш, үзләренә кирәкле белешмәләр, консультацияләр һәм басма мәгълүмати материаллар алып китүчеләрнең исәбе юк. Казан буенча эш урыннары турындагы мәгълүматлар шәһәр һәм аның районнарының мәшгульлек үзәкләрендәге стендларда, www.kazantrud.ru, www. tatartrud.ru, www. trudvsem.ru сайтларында урын алган.

Казан шәһәре мәшгульлек үзәге директоры Валерий Корнеев сүзләренчә, Казанның хезмәт базарындагы вазгыять халыкның дәүләт мәшгульлек үзәкләренә мөрәҗәгать итүе арта баруы турында сөйли. Соңгы 2 айда гына да 7455 кеше эш табуда ярдәм сорап мөрәҗәгать белән килгән, шуларның 78 проценты, ягъни 5842се закон буенча эшсез дип танылган.

Искәртеп үтәбез: Казанда хәзерге вакытта 599 предприятие һәм оешмада 6120 эш урыны бар, ә эшсезләр саны, 16 мартка алынган рәсми мәгълүматлар буенча, - 10887 кеше.

ТР Хезмәт, мәшгульлек һәм социаль яклау министрлыгыннан алынган мәгълүматларга караганда, эшсезләрнең 69 проценттан артыгы – хатын-кыз, 56 проценты – югары һәм урта һөнәри белемле. Ђ бүген тәкъдим ителгән буш эш урыннарының 62 проценты эшче белгечлекләре буенча булса, 14 проценты – хатын-кызлар өчен.