Казанда "БДБ инновацион киңлеге үсеше" дигән Халыкара форум узачак

16 февраль көнне ТР Хөкүмәтендә ТР Премьер–министрының беренче урынбасары Борис Павлов 2009 елның 16–17 апрель көннәрендә Казанда узачак “БДБ инновацион киңлеге үсеше. Бердәмлек илләре сәүдә–сәнәгать палаталарының роле һәм урыны” дип исемләнгән Халыкара форумны оештыру һәм үткәрү мәсьәләсе буенча киңәшмә үткәрде.

Киңәшмәдә Татарстан Республикасы министрлык һәм ведомстволары, предприятие–оешмалары җитәкчеләре һәм белгечләре катнашты.

ТР беренче вице–премьеры билгеләп үткәнчә, Россия Федерациясе Сәүдә–сәнәгать палатасының Казанда әлеге Халыкара форумны оештыру һәм үткәрү башлангычы Татарстанның гамәлдәге инновацион инфраструктура булдырылган иң актив төбәкләрнең берсе булуына бәйле. Татарстан Республикасының әйдәп баручы фәнни һәм белем бирү үзәкләре, финанс институтларының булуы, технопарклар челтәре Татарстан предприятиеләрендә нанотехнологияләрне сәнәгый куллану мөмкинлеген бирде.

Борис Павлов шулай ук Бердәмлек илләре сәүдә–сәнәгать палаталарының ролен игътибарга алган сурәттә, мондый чараны үткәрү, һичшиксез, фән–техника өлкәсендә БДБ илләре хезмәттәшлегенә импульс бирәчәк, инновацион икътисад үсешенең локомотив төбәге буларак Татарстан Республикасының абруен ныгытачак, Татарстанның Халыкара дәрәҗәдә имиджын күтәрүче проектлар һәм программаларны гамәлгә ашыруга ярдәм итәчәк, дип билгеләп үтте.

Форум эшендә дәүләт һәм башкарма хакимият органнары, БДБ илләре сәүдә–сәнәгать палаталары, Халыкара оешмалар, эшкуарлар берләшмәсе җитәкчеләре һәм вәкилләре, кече, урта һәм эре бизнес, Россия һәм чит ил гаммәви мәгълүмат чаралары вәкилләре катнашачак.

Форумда 200гә якын кеше катнашыр дип көтелә, шуларның 80е – федераль хакимият органнары һәм берләшмәләре – РФ Төбәкләр үсеше, РФ Сәнәгать һәм сәүдә, РФ Мәгариф һәм фән, РФ Транспорт министрлыклары, “Роснанотех”, “Ростехнологияләр”, “Внешэкономбанк” дәүләт корпорацияләре, “Россия тимер юллары” Россия акционерлык җәмгыяте, ВТБ, Евразия үсеш банкы вәкилләре, 40ы – БДБ илләре, тагын 80е – Татарстан Республикасы вәкилләре, дип хәбәр итә ТР Министрлар Кабинетының матбугат хезмәте.

Киңәшмә азагында Борис Павлов Россия Федерациясе Президенты Дмитрий Медведевның 2008 елның 25 декабрендә РФ Куркынычсызлык советы һәм РФ Дәүләт Советының уртак утырышында әйткән түбәндәге сүзләрен китерде: “БДБ илләре белән хезмәттәшлек Россия өчен гаять зур әһәмияткә ия. Кризис кайчан да булса бетәчәк һәм без күршеләребез белән яңа проектларны гамәлгә ашыруга әзер булырга тиешбез”.