И.Метшин: «Казандагы «Россия чаңгы юлы»нда барлыгы 21 меңнән артык кеше катнашты»

16 февраль көнне Казан шәһәре Башкарма комитеты бүлекләре һәм муниципаль берәмлекләр органнары җитәкчеләренең чираттагы «дүшәмбе киңәшмәсе»ндә мэр Илсур Метшин, узган атнадагы эшләргә йомгак ясаганда, XXVII «Россия чаңгы юлы-2009» Бөтенросия ярышларында Казанда барлыгы 21 меңнән артык кеше катнашты, берьюлы 12 мәйданчыктан старт бирелде, дип белдерде. «Шәһәр халкының төрле яшьтәгеләре бергә шундый спорт чарасында катнашуы аеруча әһәмиятле, хәер, без нәкъ шушы максатны, ягъни «Россия чаңгы юлы» ярышларына халыкны күпләп җәлеп итүне күздә тоткан да идек», - дип искәртте шәһәр башлыгы.

Шул рәвешле, 15 февраль көнне 5 нче тапкыр үткәрелгән «Россия чаңгы юлы» чаңгы ярышларында Казанның мәктәп һәм гимназияләрендә, лицейларда, югары уку йортларында укучы яшьләр, яшүсмерләр клубларыннан яшь спортчылар, предприятиеләр, дәүләт учреждениеләре, шәһәр һәм аның район хакимиятләре хезмәткәрләре, спорт сөюче казанлылар катнашты. VIP-старт Казанда булачак Универсиада елына яраштырып 2013 метрга исәпләнгән булса, 18 яшь һәм аннан өлкәнрәкләр 10 чакрымга, 7-17 яшьлекәр 5 чакрымга йөгерде, шулай ук анда катнашучыларның физик мөмкинлекләреннән чыгып дистанцияне сайлап алу мөмкинлеге дә булды. Ир-егетләр һәм хатын-кызлар арасында призлы 6 урынга РФ Спорт, туризм һәм яшьләр сәясәте министрлыгының кубоклары, истәлекле бүләкләре һәм дипломнары бирелде.