Татарстан парламенты бюджет акчаларын экономияләү буенча чаралар тәкъдим итә

Татарстан закон чыгаручылары икътисади һәм финанс кризисы шартларында бюджет чыгымнарын экономияләүне үзләреннән башларга уйлады һәм ТР Дәүләт Советы эшчәнлеген тәэмин итү буенча чыгымнарны киметү чараларын кертте.

ТР Дәүләт Советының матбугат үзәге хәбәр иткәнчә, бу көннәрдә парламент рәисе Фәрит Мөхәммәтшин Дәүләт Советы һәм аның Аппаратын тотуга каралган чыгымнарны киметү буенча чаралар турында күрсәтмәгә кул куйды. Ђлеге документ оештыру техникасы, мебель алу, музей экспозициясен үстерү һәм вакытлы матбугатка язылу чыгымнарын кыскартуны күз алдында тота. Шулай ук гомуми кулланыштагы 20 телефон номеры, кәрәзле элемтә челтәрендәге 5 абонент кыскартылган. Моннан тыш, Дәүләт Советы автоколоннасы автомобильләренең көнгә 100 километрдан күбрәк йөрергә тиеш түгеллеге тәгаенләнгән. Спикер тарафыннан имзаланган күрсәтмә парламент һәм Президиум утырышларында таратыла торган басма материаллар комплектларының өчтән берен киметүне күз алдында тота. Альтернатива рәвешендә электрон чараларны күбрәк кулланырга тәкъдим ителә, документлар әйләнешен кагазь кулланлмый торган технологияләргә күчерү эше алып барыла. “Электрон Россия” проектын тормышка ашыру кысаларында Дәүләт Думасы һәм төбәк парламентлары арасында көнүзәк мәгълүмат алмашу технологияләре тест режимында сынала. Матбугат үзәге хәбәр иткәнчә, бу чаралар – беренче адымнар гына. Язга бюджет акчаларын экономияләү буенча яңа чаралар тәкъдим ителәчәк.