Төркия Президенты Абдуллаһ Гөлне бүген Казанда көтәбез

Россия Президенты Дмитрий Медведев чакыруы буенча илебезгә килгән Төркия Президенты Абдуллаһ Гөлне бүген Казанда көтәбез. Дүрт көнлек визитының ике көне Мәскәүдә, ике көне Казанда үтәчәк.

"Известия" газетасына биргән интервьюсында Абдуллаһ бәй үзе бу хакта болай дигән: "Визит барышында мин Минтимер Шәймиев белән дә очрашырга ниятлим. Ул – Россиянең иң бай төбәкләреннән берсе булган Татарстан башлыгы. Бу республика белән Төркиянең аерым мөнәсәбәтләре бар".

58 яшьлек Абдуллаһ Гөл – үз иленең иң күренекле сәясәтчеләреннән берсе. Республика көнендә – 29 октябрьдә туганга, аны кечкенә вакытта өендә Җөмһүрият улы дип йөртә торган булганнар. Хәзерге вакытта хатыны Хәерниса белән өч бала үстерәләр. Хәерниса ханым һәрчак яулык бәйләгән булыр. Абдуллаһ әфәнде үзе дә хакимияткә ислам казанышларын яклаучы Гаделлек һәм үсеш партиясе җитәкчеләреннән берсе буларак килде.

Мәгълүм булганча, Төркия вузларында яулык бәйләп йөрү тыелган. Узган ел Төркия Бөек Милләт Мәҗлесе, ягъни парламент бу тыюны юкка чыгармакчы иде дә, әлеге омтылыш уңышсызлыкка очрады. Бу шау-шудан соң, әлеге мәсьәлә буенча кызыксынучы журналистларга Абдуллаһ бәй, уенын-чынын бергә кушып: "Мин үзем яулык бәйләмим, ә инде хатыным бәйлиме-юкмы, ул аның үз иркендә", – дип җавап бирә.

А.Гөл – белгечлеге буенча икътисадчы. 1971 елны Истанбул университетының икътисад факультетын тәмамлаган. 1983 елны шунда ук фән докторы дәрәҗәсе алган. Диссертация язу дәверендә ике ел Лондонда укыган. 1983 –1991 елларда Согудиядәге Җиддә шәһәрендә урнашкан Ислам үсеш банкында хезмәт куйган. 1991 елдан дәүләт эшендә. 1992 –2001 елларда Европа Советында мәдәният, туризм, сәяси һәм икътисадый үсеш комитетында эшләгән. Көнбатыштагы хезмәттәшләре аны, гомумән, тумыштан дипломат дип исәпли. Яңа Төркия тарихына ул Әрмәнстанга барып Президент белән күрешкән беренче илбашы булып кереп калачак (ике ил мөнәсәбәтләрендә кытыршылыклар яшәп килүе күптән билгеле). "Минем бу визитым Кавказдагы психологик киртәне җимерде", – дип исәпли ул үзе бу уңайдан. Чынлап та, теләсә нинди проблеманы хәл итү өчен әүвәл "сөйләшүләр өстәле" янына утырырга кирәк. Төркия Президентының үзләрендәге "Бешикташ" футбол командасы җанатары булуы һәм Чыңгыз Айтматов әсәрләрен яратып укуы мәгълүм.