ОМОН белән ОМСН берләшеп, алар базасында махсус билгеләнешле үзәк булачак

ТР буенча Эчке эшләр министрлыгының махсус подразделениеләре - милициянең махсус билгеләнешле отряды (ОМСН, ә 2002 елга кадәр - СОБР) белән милициянең аерым билгеләнешле отряды (ОМОН) бер махсус билгеләнешле үзәккә (ЦСН) берләштерелеп, анда быел 1 апрельдән 2010 елның 1 апреленә кадәр эксперимент үткәрелә. Алдарак хәбәр ителгәнчә, шундый ук эксперимент, Татарстаннан кала, илнең тагын 3 төбәгенә - Алтай краена, Новосибирск һәм Түбән Новгород өлкәсенә дә кагыла. Аның нәтиҗәләре уңай булган очракта, алга таба Россиянең башка төбәкләрендә дә өлешчә (эксперимент рәвешендә) яки тулысынча гамәлгә кертү ниятләнә, дип игълан итте экспериментка эзерлек уңаеннан бүген Татарстан башкаласы Казанга килгән РФ эчке эшләр министрының беренче урынбасары Михаил Суходольский. ОМОН - массакүләм чаралар үткәргәндә җәмәгать тәртибен саклау милициясе отряды, ОМСН исә - җинаятьләр буенча эшли торган милиция отряды, һәр икесенең эш юнәлеше, кайбер функцияләре охшаш, аларны берләштерү дә шуннан чыгып отышлы санала.

Аның сүзләренчә, эксперимент милициянең махсус подразделениеләре сугышчан әзерлеген һәм мөмкинлеген үстерүне, мобильлеген арттыруны, шулай ук хезмәткәрләрнең һөнәри әзерлек дәрәҗәсен күтәрүне максат итеп оештырыла. Бу чаралар исә җәмәгать тәртибен саклау өлкәсендә һәм җинаятьчелеккә каршы көрәштә алар алдына куелган бурычларны нәтиҗәле хәл итәргә тулы мөмкинлек бирәчәк, дип саный милиция генерал-полковнигы М.Суходольский. “Болардан тыш, шушы чаралар барышында махсус подразделениеләр белән идарә итү системасы, аларны җәлеп итү тәртибе, матди-техник чаралар белән тәэмин ителеш оптимальләштереләчәк. Бердәм командалык булдырып, оператив идарә подразделениеләре, ягъни дежур частьлары белән штабларны һәм финанс, хокукый һ.б. структур подразделениеләрне шуңа кушу нәтиҗәсендә, хезмәткәрләр арасында законлылык саклану һәм дисциплинаның торышы, махсус подразделениеләрнең эшчәнлеге мәсьәләләре буенча контроль көчәйтеләчәк, эшчәнлектә яңа формалар һәм аларны куллануда методлар сынап каралачак”, - дип басым ясап әйтте ул.

Эксперимент өчен сайлап алынган 4 төбәк арасында Татарстанның да булуы исә, РФ Эчке эшләр министрлыгы вәкиле фикеренчә, менә нәрсәгә бәйле: республика кирәк булган матди-техник яктан тәэмин ителгән, эксперимент үткәрү һәм һөнәри әзерлек өчен шартлар бар, хезмәткәрләр өчен җиһазландырылган база гамәлдә, җитәкчелекнең, аерым алганда, ТР буенча Эчке эшләр министрлыгының потенциалы һәм абруе зур. “Татарстанда министрлык үзенең эшчәнлегендә фәнни егәрлекне дә файдалана белә. Бүген иртән әлеге министрлыкның укыту үзәгендә булганда пилотсыз гына эшли торган очкыч аппаратларны гамәлдә куллану үрнәкләрен үз күзләребез белән күрдек. Ул очкычлар Татарстан буенча Эчке эшләр министрлыгының махсус билгеләнешле авиация отряды карамагында һәм андый техника Казандагы гыйльми коллектив көче белән барлыкка килгән - бу бик мөһим”, - дип аңлатты Михаил Суходольский. Шуларга өстәп, 2013 елда Казанда булачак Универсиада вакытында җәмәгать тәртибен саклау мәсьәләсе буенча РФ Эчке эшләр министрлыгында сүз булган, Татарстанда тупланылачак тәҗрибә исә 2014 елда Сочида Олимпия уеннары вакытында ярап куячак, дип саный Мәскәү кунагы.

РФ эчке эшләр министрының беренче урынбасары Михаил Суходольскийны Татарстанда эчке эшләр органнарының һәм аның махсус подразделениеләре эшчәнлеге белән ТР Премьер-министрының беренче урынбасары Равил Моратов, ТР буенча эчке эшләр министры Әсгать Сәфәров һәм министрлык подразделениеләре җитәкчелеге таныштырып йөрде.