Татарстанда үрнәк итеп куярлык терлекчелек фермалары барлыкка киләчәк

Тиздән Татарстанда үрнәк итеп куярлык терлекчелек фермалары барлыкка киләчәк. Фермаларда терлекләрнең баш саны 10нан артып китәчәк. Бу хакта “Татар–информ” агентлыгына Татарстанның Фермерлар һәм крестьян хуҗалыклары ассоциациясе рәисе Камияр Байтимеров хәбәр итте.

Күптән түгел генә федераль дәрәҗәдә “2009–2011 елларда агросәнәгать комплексында крестьян (фермер) хуҗалыкларын һәм хуҗалык итүнең башка кече формаларын үстерү” программасы кабул ителде. Татарстанда ТР Авыл хуҗалыгы һәм азык–төлек министрлыгы белән берлектә гамәлгә ашырылачак әлеге документ тулысынча хуҗалык итүнең кече формалары: крестьян һәм фермер хуҗалыкларына исәпләнгән, аларны сайлап алу конкурс нигезендә узачак. Шәхси хуҗалыклар һәм фермерлар озак вакытка исәпләнгән кредитларга исәп тота, әлеге кредитларны терлекчелек биналары төзү һәм терлекләр сатып алуга юнәлдерә ала. Моннан тыш, программаны гамәлгә ашыруда катнашучыларга субсидия биреләчәк.

Яңа төзеләчәк фермаларның хәзерге терлекчелек комплексларыннан аермасы шактый зур. Аларда үрнәк тәртип сакланачак, җитештерелгән продукциянең сыйфаты да иң югары дәрәҗәдә булырга тиеш.