Мәскәүдә 2013 елгы Универсиадага әзерлек буенча Оештыру комитеты утырышы узачак

17 мартта Мәскәүдә Россиянең беренче вице–премьеры Игорь Шувалов рәислегендә 2013 елда Казанда Универсиада үткәрүгә әзерлек буенча Оештыру комитеты утырышы узачак.

Утырышта Татарстан делегациясе, 2013 елгы Универсиаданың оештыру комитеты әгъзалары катнаша.

Искәртеп узабыз, 2009 елның гыйнварында РФ Премьер–министры Владимир Путин 2013 елда Казанда XXVII Бөтендөнья җәйге универсиадасын әзерләү һәм үткәрү буенча Оештыру комитеты төзү турындагы боерыкны имзалады. Моннан тыш, Россия Премьер–министры Оештыру комитетының составын раслады, аны Россиянең беренче вице–премьеры Игорь Шувалов җитәкләде. Аның составына шулай ук ТР Премьер–министры Рөстәм Миңнеханов, Казан мэры Илсур Метшин, ТР яшьләр эшләре, спорт һәм туристлык министры Марат Бариев, Россия студентлар спорт берлеге президенты Олег Матыцин, министрлар Мутко, Левитин, Нәбиуллина, Нургалиев, Фурсенко, Щеголев һәм башка рәсми затлар керде.

Федераль бюджеттан Казанга 7 миллиард сум акча бүленер дип көтелә, шуның 1,2 миллиарды – спорт объектлары һәм Универсиада авылын проектлаштыруга, калганы аларны төзүнең беренче этабына тотылачак.

Искәртеп узабыз, 23 март көнне РФ Дәүләт Советы утырышында Россия Президенты Дмитрий Медведев Сочидагы кышкы Олимпиада һәм Казандагы җәйге Универсиадага әзерлек турында хисаплар тыңлаячак.