Татарстанда яшь лидерларны ачыклаячаклар

Россия Федерациясендә Яшьләр елы кысаларында 23–27 март көннәрендә Казанның “Сосновый бор” лагеренда Татарстан Республикасы яшьләр һәм балалар иҗтимагый берләшмәләре лидерлары һәм җитәкчеләренең VII республика конкурсы узачак.

Аны Татарстан Республикасының балалар оешмалары Советы ТР Яшьләр эшләре, спорт һәм туристлык министрлыгы белән берлектә оештыра.

Быел республиканың иң яхшы яшь лидеры исеменә Татарстанның 43 шәһәре һәм районыннан 7 яшь категориясендә 120 егет һәм кыз дәгъва кыла, дип хәбәр итә ТР Яшьләр эшләре, спорт һәм туристлык министрлыгының матбугат хезмәте. Финалга 2009 елның февраль аенда муниципаль районнарда узган сайлап алу этапларында җиңүчеләр чыкты. Быел көрәш Казан, Чаллы һәм Түбән Камада гына түгел, ә Кукмара һәм Балтач районнарында да бик кискен булды.

Республика финалында конкурсантларны бай программа көтә. Аларга үзләренең лидерлык сыйфатларын, ораторлык осталыгын күрсәтергә, социаль проектлар уйлап табарга һәм аларны гамәлгә ашырырга туры киләчәк. Яшь лидерларга өйрәнер әйберләр шактый булыр дип көтелә. “Яшьләр казанышы” иҗтимагый оешмасы инновация эшчәнлеге буенча мастер–класс күрсәтәчәк, ТР балалар оешмалары Советының экология мәктәбе кысаларында яшь лидерларга экологик тәрбия бирәчәкләр.

Программаның финал өлешендә республика балалар оешмалары Советы башкарма комитеты балалар хәрәкәтенең актуаль темалары хакында фикер алышачак, ул 2009 елның апрелендә ТР Премьер–министры Рөстәм Миңнеханов белән узачак очрашудагы сөйләшүнең төп темасы булыр дип көтелә.

Республика конкурсында җиңүчеләрнең исемнәре 26 март көнне “Сосоновый бор” лагеренда игълан ителәчәк. Бүләкләү тантанасында РФ Дәүләт Думасында Татарстаннан депутат Илдар Гыйльметдинов, шулай ук дүртенче чакырылыш ТР Дәүләт Советына сайланган депутатлар Евгений Ефимов һәм Анна Захматова катнашачак.