Р.Миңнеханов: “Без Спорт һәм сәламәт яшәү рәвеше елын тиешенчә үткәрергә тиеш”

Татарстан Премьер-министры ТР Яшьләр эшләре, спорт һәм туризм министрлыгының 2008 елгы эш нәтиҗәләрен югары бәяләде.

Бүген министрлыкның йомгаклау коллегиясендә статс-секретарь - спорт, туризм һәм яшьләр сәясәте министры урынбасары Наталья Паршикова, Россия студентлары спорт берлеге җитәкчесе Олег Матыцин, Россия Дәүләт Думасы депутатлары Илдар Гыйльметдинов һәм Виктория Черкесова, ТР Дәүләт Советы Рәисе урынбасары Римма Ратникова, Россия Олимпия комитетының генераль секретаре Юрий Юрьев, Олимпиядада катнашучы татарстанлылар, спорт мәктәпләре директорлары катнашты.

Рөстәм Миңнеханов үз чыгышында Казанда 2013 елгы Бөтендөнья универсиадасына әзерлек һәм үткәрү мәсьәләләренә аерым тукталды. “Универсиаданы югары дәрәҗәдә үткәрү өчен шәһәрнең йөзен, үзебезнең ментальлекне үзгәртергә, күп итеп спорт объектлары төзергә кирәк”, - дип ассызыклады ул.

Премьер-министр фикеренчә, 2013 елгы Уеннарны югары дәрәҗәдә үткәрү өчен безнең спортчыларны, тренерлар составын, волонтерларны Универсиадага әзерләү эшләрен хәзердән башларга кирәк. “2013 елгы Универсиада дирекциясе” МУП директоры Владимир Леонов үз чыгышында республикада талантлы спортчыларның мәгълүмат базасы тупланган, киләчәктә алар Россия җыелма командасы составына эләгергә мөмкин, дип билгеләп үтте. Аның фикеренчә, кадрлар резервын формалаштыру мәсьәләсенә дә аеруча игътибар бирергә кирәк.

Рөстәм Миңнеханов фикеренчә, Казан шәһәре Бөтендөнья студентлар уеннарын үткәрү нәтиҗәсендә танылачак. “Универсиаданы үткәрү республикада туризмны үстерү өчен җитди этәргеч булачак”, - дип ышана ул.

ТР Хөкүмәте җитәкчесе шулай ук республика Президенты тарафыннан игълан ителгән Спорт һәм сәламәт яшәү рәвеше елын тиешенчә үткәрергә тиешбез, дип ассызыклады.

Рөстәм Миңнеханов финанс кризисы проблемаларына кагылганда, төзелә башлаган бөтен спорт объектлары әзер булырга тиеш, дип белдерде. Шул ук вакытта ТР Премьер-министры якындагы ике ел гади булмаячак, шул сәбәпле, республиканың шәһәр һәм районнарында спорт инфраструктурасы объектлары төзелеше темпларын саклап калып булмаска мөмкин, дип билгеләп үтте.

Татарстан Премьер-министры ТР Яшьләр эшләре, спорт һәм туризм министрлыгының 2008 елгы эш нәтиҗәләрен югары бәяләде һәм тармакның алдынгы хезмәткәрләрен, спортчыларын бүләкләде. ТР Президенты Указы нигезендә Параолимпия уеннарының көмеш призеры Айрат Зәкиев һәм аның тренерына “Данлы хезмәте өчен” медале тапшырылды. Калганнарга ТР Президенты һәм Татарстан Министрлар Кабинетының рәхмәт хатлары тапшырылды.