Казан шәһәре Думасы сессиясендә мэр Илсур Метшин узган елгы эшчәнлеккә хисап тотты

Хәзерге вакытта Казан Ратушасында мэр Илсур Метшин рәислегендә шәһәр Думасының XXXIX сессиясе бара. Быел беренче үткәрелә торган сессия эшендә ТР Премьер-министрының беренче урынбасары Борис Павлов, ТР Дәүләт Советы рәисе урынбасары Александр Гусев, ТР министрлыклары һәм Хисап палатасы, шәһәр прокуратурасы җитәкчеләре һ.б. рәсми затлар, шулай ук IV чакырылыш ТР Дәүләт Советына яңа сайланган депутатлар катнашты.

Ике дистә мәсьәләне эченә алган көн тәртибенең беренче өчесе буенча депутатлар һәм сессия эшенә чакырылган кунаклар алдында И.Метшин шәһәр җитәкчесе буларак үз эшчәнлеге, Казан шәһәре Думасы һәм шәһәр Башкарма комитетының узган елдагы эшчәнлеге буенча берләштерелгән хисап доклады белән чыкты.

«Узган ел соңгы 3 елда шәһәр һәм аның икътисады өчен иң уңышлы елларның берсе булды... Казан, Татарстан Республикасы Президенты һәм Хөкүмәте ярдәме белән, төп социаль-икътисади күрсәткечләр буенча Россиянең миллионлы халкы булган зур шәһәрләре арасында алдагы урыннарның берсен били: 9 нчы урыннан хәзер 3 нче урынга чыкты. Ђйләнә-тирә мохиткә зыян салган өчен акча җыю буенча Казан - беренче», - дип игълан итте мэр.

Татарстан башкаласының тулаем территориаль продукты узган елда 271,3 млрд. сум тәшкил итте, бу исә 2007 елдагыдан 42,6 млрд. сумга артыграк, ә сәнәгать җитештерүчәнлеге - 107,4 процент, дип билгеләп үтте ул. Аерым алганда, Казанның сәнәгать предприятиеләре барлыгы 124 млрд. сумга якын (2007 елда – 18,7 млрд. сум) күләмдә үзләре җитештергән товарны төяп озатуга, хезмәт күрсәтүгә ирешкән.

Мэр шәһәр бюджетының керемнәре һәм чыгымнары, муниципаль бурыч суммасы, шәһәр икътисадына инвестицияләр җәлеп итү, халыкның эш белән тәэмин ителеше һәм хезмәт хакы, җәмәгать транспорты эше, торак-коммуналь хуҗалык, торак төзелеше, кече һәм урта бизнес өлкәләре буенча хисап тотты. И.Метшин шулай ук мәгариф, сәламәтлек саклау, спорт, яшьләр сәясәте һ.б. мәсьәләләргә тукталды.

Аннан соң шәһәрнең Вахитов муниципаль районы башлыгы Руслан Шакиров билгеләп үткәнчә, узган елны планда каралган барлык түләүләр буенча эш тулысынча башкарылган, ләкин финанс кризис үзен хәзердән үк сиздерә: районда хезмәт хакы буенча 40 млн. сум бурыч бар (шәһәр буенча – 62 млн. сум), нигездә, предприятиеләрдә. ТР Дәүләт Советына депутат булып сайланган Казан моторлар төзү берләшмәсе генераль директоры Дамир Кәримуллин сүзләренчә, быел җитештерү күләме 25-30 процент чамасы кимергә мөмкин дип фаразлана. 55 нче мәктәп директоры Любовь Романова исә чыгышында Казан мәктәпләренең яртысы диярлек 40 ел элек һәм аннан да алдан төзелгән булуына игътибарны юнәлдереп, андый мәгариф учреждениеләрендә заманча шартлар булдырырга кирәклеген искәртте. Мәктәпләр эшчәнлеген тикшерү максаты белән килүчеләр күплегеннән зарланып, ул тикшерүләрне берләштереп булмасмы, мәктәп директорына һәм укытучыларга балаларга белем бирү һәм тәрбия эшләренә вакыт күбрәк калыр иде, дигән мөрәҗәгать белән чыкты.