Казанда 2013 елгы Универсиада авылы 11,5 миллиард сумга төшәчәк

Казанда 2013 елгы Универсиада авылы һәм спорт объектлары төзелешенә федераль бюджеттан 7 миллиард сум акча бүлеп биреләчәк. Бу хакта бүген ТР Яшьләр эшләре, спорт һәм туризм министрлыгының коллегия утырышында Татарстан Премьер-министры Рөстәм Миңнеханов хәбәр итте.

Рөстәм Миңнеханов РФ Спорт, туризм һәм яшьләр сәясәте министрлыгына ярдәме өчен рәхмәт белдерде. “Безнең арзан булмаган башлангычлар һәрвакыт теләктәшлек таба”, - дип билгеләп үтте ул.

“Иң мөһиме – 2013 елда Бөтендөня универсиадасын үткәргәч, бу вакыйга өчен төзелгән спорт объектлары Татарстан башкаласы, Казан университетлары байлыгы булсын иде. Киләчәктә барлык төзелгән корылмаларның да халык өчен файдалы булуы кирәк”, - диде Рөстәм Миңнеханов.

Коллегиядә катнашкан статс-секретарь - спорт, туризм һәм яшьләр сәясәте министры урынбасары Наталья Паршикова сүзләренчә, а 2013 елда Универсиада үткәргәч, Казан җәйге спорт төрләре буенча спортчыларны әзерләүче федераль үзәк булачак. “ 2013 елгы Уеннар Россиянең җыелма командаларын әзерләү өчен яхшы инфраструктура булдырырга мөмкинлек бирә”, - дип белдерде ул.

“Татар-информ” агентлыгы хәбәрчесенә “2013 елгы Универсиада дирекциясе” МУП директоры Владимир Леонов белдергәнчә, 2013 елгы Уеннар бюджетына төзәтмәләр кертелергә мөмкин. “Дөньяви финанс базарындагы вәзгыять нәтиҗәсендә, төзелеш эшләре, шулай ук төзелеш материаллары бәясе дә төшә. Быел әзер булырга тиешле проектларның соңгы бәясе билгеле булачак”, - дип билгеләп үтте ул.

Владимир Леонов сүзләренчә, 2013 елгы Универсиада спорт объектлары төзелешенең якынча бәясе 25 миллиард сум, Универсиада авылы 11,5 миллиард сум бәяләнә. Тагын 40 миллиард сум акчаны юл инфраструктурасына, 30 миллиард сумны метро станциясе төзелешенә юнәлдерү планлаштырыла. Моннан тыш, куркынычсызлык, медицина мәсьәләләре дә бар.