Р.Миңнеханов: "Пенсия фонды бюджетының керем өлешен тәэмин итү- иң мөһим бурыч"

Күптән түгел РФ Пенсия фондының ТР идарәсе ярдәме белән “РФ Пенсия системасы нигезләре” дигән 2 томлык дөнья күрде. Киң катлам гражданнар даирәсенә исәпләнгән бу китап бүген коллегия утырышы алдыннан ТР Премьер-министры Рөстәм Миңнехановка презентацияләнде.

Хөкүмәт башлыгы Татарстан идарәсенең бу эшен башка структуралар өчен үрнәк булуын билгеләп, Россия Пенсия фонды Татарстан идарәсенең соңгы елларда халык белән эшләүне оештыру, камилләштерүгә зур игътибар бирүен ассызыклады.

Шул ук вакытта ул икътисади кризис белән бәйле рәвештә, 2009 елда пенсия органнары алдында торган төп бурычларга тукталды. Алар – Пенсия фонды бюджетының керем өлешен һәм пенсия түләүләрен вакытында биреп баруны тәэмин итүдән гыйбарәт. Бүгенге көндә республика гражданнарының 27 проценты пенсия алучылар, катлаулы чорда аларның лаеклы яшәвен тәэмин итү көнүзәк мәсьәлә булып тора. 1990 еллар ачы тәҗрибәсе һәркемнең хәтерендә. “Ул елларда Татарстанда гамәлдәге пенсияләрне вакытында түләү буенча кыенлыклар туды, зур бурычлар җыелды. Эшне системалаштыру нәтиҗәсендә республика кыенлыкларны үтеп чыга алды. Бүген узгандагы ялгышларны кабатларга ярамый”, - дип белдерде Хөкүмәт башлыгы. Аның сүзләренә караганда, кризис дәвам итә калганда, федераль үзәк ярдәменә өметләнү кыен булачак. Шуңа күрә, ди ул, республикага үз көченә исәп тотарга туры киләчәк.

Моның өчен салымнарны вакытында җыю һәм Пенсия фондының керем өлешен тәэмин итәргә кирәк. Пенсия фонды Татарстан идарәсе, аның төбәк органнары бу эштә салым органнары, Хөкүмәт, муниципалитетлар белән тыгыз эшләргә тиеш.

Кризис шартларында күп предприятиеләр чыгымнарын оптимальләштерүгә кереште. Премьер белдергәнчә, алар чыгымнарны кыскартуны еш кына салым түләүләре, Пенсия фондына иминият кертемнәре башкаруны туктатудан башлый. Шул рәвешле бу эшне финанс хәле уңайланганчы дип тоткарламакчы була.“Моңа берәүнең дә хакы юк. Салым түләүләрен башкаруга катгый мониторинг булдырылырга тиеш”, - дип белдерде Рөстәм Миңнеханов.