Милли музейда француз теле буенча бәйге үткәрелә

21 март көнне ТР Милли музеенда экскурсоводлар өчен бәйге үткәрелә. Ул, Франкофония көннәре кысаларында, “Альянс Франсез – Казан” оешмасы тарафыннан, Казан дәүләт университеты Тел институтының француз теле кафедрасы һәм Милли музей белән берлектә оештырыла.

Чараның максаты — француз телен һәм мәдәниятен популярлаштыру, яшьләрне республиканың тарихи һәм мәдәни мирасын саклауга өндәү. Шуңа да бу көнне музейга мәктәп укучылары, студентлар һәм француз телен өйрәнүчеләр чакырыла.

Милли музейның матбугат хезмәтеннән алынган мәгълүматларга караганда, конкурс 2 турда үткәрелә. Беренче тур барышында конкурсантлар экскурсиянең бер өлешен Казан буенча тәкъдим итәргә тиеш була. Чыгыш ясау өчен аларга 3тән алып 5 минутка кадәр вакыт бирелә. Материалны тәкдим итү катнашучылар теләгеннән чыгып башкарыла. Коллажлар, фото- һәм видеоматериаллар да кабул ителә.

Беренче этапны узган катнашучылар “Мәктәп укучылары” һәм “Студентлар” дигән ике категориягә бүленеп көч сынаша. Бәйге шартлары буенча, “Мәктәп укучылары” төркеме Милли музейның “XVIII йөздә Казан губерниясе” дигән экспозициясе нигезендә бирелгән сорауларга француз телендә җавап бирергә тиеш була.

“Студентлар” төркеменә исә шулай ук “XVIII йөздә Казан губерниясе” дигән экспозиция нигезендә тематик экскурсиянең бер өлешен тәкъдим итәргә кирәк булачак. Чыгыш ясау өчен 3тән алып 5 минутка кадәр вакыт бирелә. Ђлеге төркемдә җиңү яулаучыга җәй көне Франциягә бару өчен юллама, ә “Мәктәп укучылары” төркемендә җиңүчегә DELF Junior халыкара имтиханына әзерлек төркемендә бушлай уку мөмкинлеге бирелә. Бәйгедә катнашучыларның мөмкинлеген француз теле укытучылары, туристлык компанияләре һәм ТР Милли музее хезмәктәрләреннән торган жюри бәяләячәк.