Р.Моратов: “Фән, инновацияләр өлкәсендә нәтиҗәләргә ирешмичә, кризистан чыга алмаячакбыз"

5 февраль көнне ТР Фәннәр академиясендә тантаналы рәвештә Россия Фәне көне билгеләп үтелде. Тантанада ТР Премьер-министрының беренче урынбасары Равил Моратов, ТР Дәүләт Советы рәисе урынбасары Римма Ратникова, ТР Фәннәр академиясе президенты Ђхмәт Мәзһаров, КДУ ректоры, ТР югары уку йортлары ректорлары советы рәисе Мәкъзүм Сәлахов һәм галимнәр, күпсанлы кунаклар катнашты.

Равил Моратов, галимнәрне, фәнни җәмәгатьчелекне һөнәри бәйрәмнәре белән котлап: “Фәннең теләсә кайсы дәүләтнең социаль, иҗтимагый-сәяси үсешенә керткән өлешен бәяләп бетерергә авыр. Безнең илдә фәнни тикшеренүләргә караш соңгы 20 елда сизелерлек үзгәрде. Бу хакта фәнне үстерүгә җибәрелгән бюджет чараларының параметрлары да сөйли. Татарстанда республика Президенты да, Хөкүмәт тә фән үсешенә карата аеруча кайгыртучанлык күрсәтүен билгеләп үтәсем килә”, - диде. Вице-премьер үз чыгышында Россиянең, аерым алганда, Татарстанның да инновацион үсеш юлыннан атларга тиешлеген билгеләп узды. “Моның нигезендә иң элек фәнни белемнәр ята”, - диде ул. Ђлеге күрсәткеч буенча дөнья күләмендә Россия – тугызынчы, Татарстан ил күләмендә, Мәскәү һәм Санкт-Петербургтан гына калышып, өченче урынны били.

“Ђмма без республикада, Россия төбәкләрендә фәнни инновацион үсешнең канәгатьләнерлек булмавын яхшы аңлыйбыз. Без фән һәм инновацияләр өлкәсендә югары нәтиҗәләргә ирешмичә торып, икътисади кризистан чыга алмаячакбыз”, - диде Р.Моратов.

Аның сүзләренчә, ТР Президенты фәнни җәмәгатьчелек алдына икътисадның барлык секторларында, социаль һәм сәяси өлкәләрдә фәнни һәм гамәли тикшеренүләрне югары дәрәҗәгә җиткерү бурычын куйган. Республикада инновацион фәнни потенциалны мөмкин кадәр тизрәк үстерү өчен технопарклар һәм бизнес инкубаторлар төзелгән.

Равил Моратов шул ук вакытта куелган бурычларның акрын хәл ителүен билгеләп үтте. Ул республикада тәҗрибәле практиклар тарафыннан кризиска каршы чаралар планы эшләнүен, әмма анда фәнни җәмәгатьчелекнең бик аз күләмдә катнашуын хәбәр итте. “Монда сезнең гаебегез юк, чөнки җәмгыятебезнең практик өлеше белән фундаменталь-тикшеренү өлешенең төгәл бәйләнеше юк. Шуңа бәйле рәвештә алдагы айларда мондый тикшеренүләр уздыру бурычы куела. Хәзер бу Фәннәр академиясенең турыдан-туры вәкаләтләренә керә”, - диде вице-премьер.

Р. Моратов үз чыгышында бүгенге көндә ТР Фәннәр академиясенең бердәм хокукый-фәнни-тикшеренү җирлеген барлыкка китерү белән шөгыльләнүен, эшчәнлекне оештыруның төрле формалары барлыкка килүен, фәнне җитештерү өлкәсендә кертү зарурлыгын билгеләп үтте. Ул шулай ук академик институтлар белән вузларның хезмәттәшлек итү мәсьәләсенә тукталды, ТР Фәннәр академиясенең корпоратив фәнне үстерүдә төп рольне уйнарга тиешлеген белдерде. “Фәннәр академиясенең һәр институты профильле вуз белән эшләргә тиеш. Башкача республикада бердәм фәнни инновацион системаны төзеп булмаячак”, - диде Р.Моратов.

Вице-премьер әзерлекле галимнәрнең фәннең төп байлыгы, аның үсеш нигезе булуын ассызыклап үтте. “Бу өлкәдәге реформалар әзерлекле белгечләргә, эш һәм яшәү, һөнәри үсеш өчен лаеклы шартлар тудыруга юнәлтелгән булырга тиеш”, - дип, ул республикага илдәге һәм дөньядагы билгеле фән мәктәпләреннән галимнәрне җәлеп итәргә чакырды.

Равил Моратов бүгенге көндә килеп туган шартларда икътисадны яңарту бурычы торуын, финанс кризисыннан яңартылган икътисад белән чыгарга кирәклеген ассызыклап үтте. Џәм алга куелган бурычларны хәл итү өчен көчләрне берләштерергә, шул чакта уңышларга ирешергә мөмкин икәнлеген белдерде.