Удмуртиядә Татар мәдәнияте һәм әдәбияты көннәре узды

Удмуртиянең Можга, Сарапул, Ижау шәһәрләрендә узган “Удмуртиядә татар мәдәнияте һәм әдәбияты көннәре”нә багышланган тантаналар тарихыбыз сәхифәсендә үзенең лаеклы урынын алды. Республикабыз тарихында мондый тантаналарның өченче тапкыр үткәрелүе билгеле. Быелгысына килгәндә, ул аеруча үтемле һәм үзенчәлекле булды. Ошбу тантаналар урындагы дәүләт органнарында эшләүчеләр, күрше республикаларның дәрәҗәле хөкүмәт җитәкчеләре, министрлыклар вәкилләре катнашлыгында, күркәм мәдәният сарайларында, башкалабыз Ижауда исә, күптән түгел генә сафка баскан, Татарстан кунакларын да таң калдырган, республикабызның горурлыгы саналган – Халыклар дуслыгы йортында үтте.

Ђйтергә кирәк, Можга шәһәре администрациясе Казан һәм Ижаудан килгән делегацияләр вәкилләрен тулы әзерлек белән каршы алды. Шәһәр белән танышу бүгенге замана таләпләренә тәңгәл килерлек итеп җиһазландырылган, спорт заллары, хезмәткә өйрәтү өчен бөтен мөмкинлекләре булдырылган мастерскойлары булган урта белем бирүче укыту-тәрбия учреждениесенә экскурсиядән башланды.

Көндезге очрашулардан соң, кичен тантана дәрәҗәле кунаклар, Татарстанның Арча районынныннан, Менделеевски шәһәреннән килгән делегация вәкилләре “Дубитель” мәдәният сараена җыелган күп санлы милләттәшләребез катнашлыгында танылган җәмәгать эшлеклесе, үзешчән композитор, шагыйрь Илгиз Кадыйровның 70 еллык юбилеена һәм шул уңайдан дөнья күргән “Яшим әле, яшним” дигән икенче җыентыгын халыкка тәкъдим итүдән башланды. Тантана кысаларында аңа “Удмуртиянең атказанган мәдәният хезмәткәре” дигән исем дә бирелде. Ул шулай ук, татар әдәбиятын үстерүгә керткән хезмәте өчен, Татарстан Язучылар берлегенең шәрәфле әгъзасы булуын дәлилләүче документка да ия булды.

“Удмуртиядә татар мәдәнияте һәм әдәбияты көннәре”нең төп өлеше башкалабызның “Халыклар дуслыгы йорты” бинасының зур залында башланды. Республикабызның татарлар күмәк гомер кичергән төбәкләреннән килгән милләттәшләребез, Ижауда яшәүче активистларыбызны тулыландырды. Татар халкы белән очрашуга республикабызның Премьер-министр урынбасары, милләттәшебез Илдар Бикбулатов, мәдәният министры урынбасары Наилә Собина, башкалабыз мэры Виктор Балакин, ә Татарстан делегациясенә мәдәният министры урынбасары Гөлшат Нигъмәтуллина кушылды.

Удмуртия татарларының милли-мәдәни автономиясе рәисе Ирек Шәриповның кереш сүзеннән соң, халык алдында чыгыш ясаучылар – Илдар Бикбулатов, Виктор Балакин, Татарстан Республикасы делегециясеннән Рәмис Сафин, Гөлшат Нигъмәтуллина очрашулар вакытында калкып чыккан проблемаларны хәл итүдә үзләреннән лаеклы өлеш кертәчәкләрен белдерделәр.

Казан кунаклары мәктәптә эшләп килүче Муса Ќәлил музее эшчәнлегенә аеруча югары бәя бирде. Казанда һәм Ижауда гомер кичерүче каләм осталары очрашуда катнашучыларның сорауларына җавап тотты, үзләренең иҗат җимешләрен мәктәп коллективына бүләк иттеләр. Ике як та мондый очрашуларның дәвамлы булуына ышанычларын югалтмауларын белдерде.

Башкалабызда Казан делегациясе ике төркемгә бүленеп эшләде. Татарстан һәм Удмуртия каләм осталары башкалабызның 10нчы мәктәбенә юл тоттылар. Бирегә Ижауның башка мәктәпләрендә татар сыйныфларында белем алучылар, татар теле һәм әдәбияты укытучылары җыелган иде. Кунаклар балаларның үз телебездә сәламләүләренә дә шаһит булдылар, шигырь укуларын да тыңладылар, җыр-биюләрен дә тамаша кылдылар.