Агитация өчен – бушлай эфир

Татарстан Республикасы Үзәк сайлау комиссиясендә республика дәүләт теле- һәм радиотапшырулар каналларында: "Яңа гасыр" телерадиокомпаниясе", "Татарстан "Яңа гасыр" радиосы, "Татарстан" ГТРК, "Россия радиосы" радиосында бушлай эфир вакытын бүлү буенча жирәбә үткәрелде.

Республика кандидатлар исемлекләрен теркәгән дүрт сәяси партиягә: "Единая Россия", КПРФ, ЛДПР, "Справедливая Россия"гә әлеге теле- һәм радиоканалларның төбәк бүлекләренең һәркайсында бөтен агитация чорына 60 ар минутлык бушлай эфир вакыты бирелә. Шуның 30 минутын алар уртак агитация чаралары (дебатлар), 30 минутын шәхсән агитация чаралары өчен файдаланачак.

Бер мандатлы сайлау округларында теркәлгән 180 депутатлыкка кандидатның һәркайсы шәхсән чыгыш ясау өчен 1 минут 35 әр секундлык бушлай эфир вакыты алачак. Бер мандатлы сайлау округларында теркәлгән һәр кандидатка 5 әр минуттан кимрәк кенә вакыт туры килгәнлектән, Татарстан Республикасы Сайлау кодексында аларга уртак агитация чараларын үткәрү өчен вакыт күздә тотылмый.

Сайлау алды дебатлары дөньяның күп кенә илләрендә сайлау кампанияләренең аерылгысыз өлеше булып тора. Бүгенгә дүрт партиянең берсе дә аларда катнашудан баш тартмады әле. Димәк, Татарстан сайлаучылары турыдан-туры теле- һәм радиоэфирда партия вәкилләренең көн кадагына сугучы темалар буенча бәхәсләшүләрен күзәтү һәм тыңлау мөмкинлеге алачак. Дебатлар фәкать эш көннәрендә генә тамашачылар игътибарына җиткереләчәк.

"Яңа гасыр" телерадиокомпаниясе" уртак агитация чараларын 4, 11, 18, 25 февральдә 17.30 дан 18.10 сәгатькәчә күрсәтәчәк.

"Татарстан" ГТРК каналы тамашачылары исә аларны 4, 6, 9, 11, 13, 16, 18, 20, 25, 27 февральдә 11.30дан 11.50 сәгатькә кадәр карый алачак.

Дебатларны турыдан-туры радиоэфирда "Татарстан "Яңа гасыр" радиосында 3, 10, 17, 24 февральдә 11.15 тән 11.45 сәгатькәчә, шулай ук "Россия радиосы"нда 3, 5, 10, 11, 13, 17, 18, 20, 24, 26 февральдә 10.10 сәгатьтән 10.30 сәгатькәчә тыңларга була.

Кичә дәүләт телерадиотапшырулар төбәк оешмалары, закон нигезендә, кандидатлар һәм партияләр арасында түләүле эфир вакытын бүлү буенча жирәбә үткәрде.

Жирәбә нәтиҗәләре Татарстанның дәүләт матбугат чараларында басылып чыгачак.

Массакүләм мәгълүмат чараларында агитация чорының тавыш бирү көненә 28 көн кала, ягъни 2009 елның 31 гыйнварында башланып, тавыш бирү көненә бер тәүлек кала, җирле вакыт буенча 00 сәгатьтә, ягъни 2009 елның 28 феврале, 00 сәгатьтә төгәлләнүен искә төшерик.