Р.Миңнеханов: "Әгәр республика үз милкеннән керем алмаса, башка чыганак таба алмаячакбыз"

11 мартта ТР Премьер-министры Рөстәм Миңнеханов катнашында ТР Җир һәм мөлкәти мөнәсәбәтләр министрлыгының узган ел йомгакларына һәм 2009 ел бурычларына багышланган коллегия утырышы булды. Анда ТР җир һәм мөлкәти мөнәсәбәтләр министры вазифаларын башкаручы Азат Хамаев төп доклад белән чыкты.

Министрлык идарәчелегенә Дәүләт заказы кысаларында 23 индикатор расланган иде, ләкин аларның 1се - дәүләт өлеше булган акционерлык җәмгыятьләрендә дивидентларның 50 проценттан артык үсеше буенча каралган индикатор үтәлмәде, сәбәбе - икътисади кризис, шул ук вакытта дивидентлар буенча план заданиесе арттырып үтәлде, дип белдерде ул. Министрлык эшчәнлегенең гомумиләштерелгән күрсәткече буларак А.Хамаев дәүләт милкенең һәм җирләренең керемлелеген атады. Аерым алганда, аның сүзләренчә, узган елны республика бюджетына 6,6 млрд. сум акча кергән, бу исә 2007 елдагыдан 34 процентка күбрәк, ә җирле бюджетларга - 4,2 млрд. сум (20 процент үсеш). Республика дәүләт милкенең гомуми баланс бәясе бүген 230 млрд. сум белән исәпләнә.

ТР Муниципаль берәмлекләре советы рәисе, Чирмешән районы башлыгы Минсәгыйть Шакиров исә муниципаль милек формалашу нәтиҗәләре һәм проблемалары, "Химград" индустриаль технополисының идарәче компаниясе генераль директоры Альберт Кәримов нәтиҗәсез кулланылыштагы милек базасында эшмәкәрлеккә ярдәм инфраструктурасы булдыру мәсьәләләре буенча чыгыш ясады. Әлеге чарада тагын "Нижнекамскнефтехим" ААҖ генераль директоры урынбасары Игорь Ларионов җәмгыятьнең үсеше, Чистай муниципаль районының җир һәм мөлкәти мөнәсәбәтләр палатасы рәисе Нәфис Гәрәев алынмый калган өлешле җирләргә муниципаль милек хокукларын тану барышы турында хисап тотты.

Республика җире һәм милкеннән алынган 10 млрд. сумнан күбрәк керем әле соңгы чик түгел, дип, республика Хөкүмәте җитәкчесе Р.Миңнеханов күп кенә мөлкәти комплекслар исәпкә алынмаганлыгын яки башкача формада исәптә торуын басым ясап әйтте. "Бездә булган барлык милек республика файдасына эшләргә тиеш - бу бизнесның керем чыганагы һәм нормаль эшләр өчен инструменты. Мәсәлән, нефть суырту компанияләре өчен җир бирү мәсьәләсендә бу министрлык һәм муниципаль берәмлекләрнең эшчәнлеге нәтиҗәсендә, тулаем илдә нефть чыгару кимегәндә, безнең нефть суырту мөмкинлегебез артты", - дип билгеләп үтте.

Премьер-министр кистереп әйткәнчә, бу ел ничек кенә кыен булмасын, аренда түләве, дивидентлар, җир салымы рәвешендә республика үзенең милкеннән керем алырга тиеш. "Хәзерге вакытта бюджетка узган елгыдан 35-40 процентка кимрәк акча керү куркынычы бар. Әгәр милкебездән керем алмасак, башка чыганак таба алмаячакбыз", - дип, мәсьәләнең асылын ачты Р.Миңнеханов.

Эш нәтиҗәләре югары бәяләнгән бер төркем җаваплы хезмәткәргә утырыш соңында ТР Министрлар Кабинетының һәм министрлыкның Рәхмәт хатлары тапшырылды. Р.Миңнеханов, министр Валерий Васильевның ТР Парламентына сайлануы уңаеннан, аның дәүләт постларында ышанычны аклавы өчен рәхмәт белдерде һәм ТР Министрлар Кабинеты исеменнән Рәхмәт хаты белән истәлек бүләге тапшырды.

Коллегия утырышында шулай ук ТР Министрлар Кабинеты, ТР Дәүләт Советы, прокуратура, министрлыклар һәм ведомстволар вәкилләре дә катнашты.