IV Казан венчур ярминкәсе 23-24 апрельдә узачак

Казан чираттагы венчур ярминкәсенә әзерләнә. Әлеге традицион чара быел, гадәттәгедән иртәрәк, 23-24 апрель көннәрендә узачак. Бу хакта бүген журналистларга ТР Министрлар Кабинетында узган брифингта ТР Инвестиция-венчур фонды директоры Айнур Әйдельдинов хәбәр итте.

Татарстанда Венчур ярминкәләре уздыру тарихы 2005 елга барып тоташа. Нәкъ менә Казанның 1000 еллык юбилее елында Татарстан башкаласында I Төбәк Венчур ярминкәсе үткән иде. Ике тапкыр шул статуста оештырылганнан соң, узган елдан башлап ул Казан венчур ярминкәсе дигән яңа исем белән үткәрелә башлады.

Татарстандагы һәм Идел буе федераль округына кергән башка төбәкләрдәге кече һәм урта бизнес компанияләренең инновация мөмкинлекләре тәкъдим ителә торган бу чараны «Идея» технопаркы, ТР Инвестиция-венчур фонды, Россиянең Туры һәм венчур инвестицияләре ассоциациясе ТР Министрлар Кабинеты, Фән һәм инновацияләр буенча федераль агентлык ярдәмендә оештыра. Узган елгы III Казан венчур ярминкәсендә Россиянең 14 шәһәреннән 120 дән артык инвестиция компаниясе тәкъдим ителгән иде. Алар нефть, газ, химия сәнәгате, машина, җиһазлар төзелеше, энергетика, мәгълүмат технологияләре, авыл хуҗалыгы, биотехнологияләр, медицина, фармокология, төзелеш кебек перспектив юнәлешләрне эченә алды.

Айнур Ђйдельдинов сүзләренә караганда, быел да шушы перспектив юнәлешләр сакланачак. Ярминкәгә үз бизнесларына туры инвестицияләр җәлеп итүгә кызыксыну белдерүче компанияләр чакырыла. Шулай ук анда Россия һәм чит илләрнең венчур һәм туры инвестицияләр фондлары, стратегик һәм шәхси инвесторлар, эре корпорацияләр, юридик һәм консалтинг оешмалары, федераль һәм төбәк министрлыклары вәкилләре чакырыла. 15 марттан экспонент-компанияләр исемлеген туплау эше башланачак. “Венчур ярминкәсе югары технологияләр, инновацияле производство һ.б. шөгыльләнүчеләр, дәүләт хакимияте органнары, финанс, бизнес структуралары өчен аралашу мәйданы. Аның алар өчен әһәмияте зур. Бу чара кече һәм урта бизнесны финанс инструментлары, инфраструктура белән тәэмин итү буенча алып барыла торган системалы эшнең бер өлеше”, -ди Инвестиция-венчур фонды җитәкчесе. Аның сүзләренә караганда, узган 3 ярминкәне чагыштыру шуны күрсәтә: елдан-ел аларда катнашучыларның саны гына түгел, сыйфаты да яңа дәрәҗәгә күтәрелә бара.