ТР эчке эшләр министры Әсгать Сәфәров Чечня Республикасы Президенты белән очрашты

5 мартта Татарстан Республикасы буенча эчке эшләр министры, милиция генерал-лейтенанты Ђсгать Сәфәров Чечня Республикасына эш сәфәрен төгәлләде. Сәфәр вакытында ул Гудермес районында урнашкан Татарстан милициясенең җыелма отрядлары хезмәткәрләренең хезмәт итү һәм яшәү шартлары белән танышты.

Татарстанның эчке эшләр министры хезмәттәшләре каршында чыгыш ясаганда, ярты ел дәвамында Чечня Республикасы территориясендә җәмәгать тәртибен һәм гражданнар куркынычсызлыгын тәэмин итүче коллегаларына яхшы хезмәт итүләре өчен рәхмәт белдерде.

“Сез Татарстанның хокук саклау органнары хезмәткәрләре буларак, тәртибегез, алдыгызга куелган бурычка намуслы каравыгыз белән башкалар үрнәк алырлык булырга тиеш”, - дип билгеләп үтте министр.

Ђсгать Сәфәровны Чечня Республикасы буенча эчке эшләр министры милиция генерал-лейтенанты Руслан Алханов озатып йөрде. Алар Россиянең эчке эшләр министры урынбасары – Чечня Республикасында Оператив штаб җитәкчесе милиция генерал- полковнигы Аркадий Еделев белән очраштылар. А.Еделев Төньяк Кавказда Татарстан милиционерларының җинаятьчелеккә каршы көрәш һәм тәртип саклау эшчәнлеген югары бәяләде.

Эш сәфәре тәмамланганда Ђсгать Сәфәров Грозныйда Чечня Республикасы Президенты Россия Герое Рамзан Кадыйров белән очрашты. Төбәк җитәкчесе Татарстан Республикасы һәм Эчке эшләр министрлыгы җитәкчелегенә Чечня Республикасында җәмәгать тәртибен һәм гражданнар куркынычсызлыгын тәэмин итүдә күрсәткән ярдәмнәре өчен рәхмәт белдерде.

“Татарстанның Эчке эшләр органнары үзләрен Чечня Республикасында уңай яктан гына күрсәтте. Безнең республикада иң авыр вакытта Татарстан милиционерлары хокук тәртибен саклауга, хокук бозулар һәм җинаятьләрне ачыклауга зур өлеш керттеләр”, - дип ассызыклады Рамзан Кадыйров.

Чечня Республикасы Президенты сүзләренчә, Татарстан милиционерлары биредәге хезмәттәшләренә матди-техника базасын яңартуда да сизелерлек ярдәм күрсәткәннәр. Татарстанның эчке эшләр министры үз чиратында, Чечня Республикасы һәм Эчке эшләр министрлыгы җитәкчелегенә Төньяк Кавказда хезмәт итү вакытында Татарстан милиционерларына күрсәтелә торган ярдәм өчен рәхмәт белдерде.

Шулай ук ул киләчәктә дә Татарстан милиционерлары хезмәт бурычларын намус белән үтәячәкләренә ышаныч белдерде. “Безнең милиционерлар Чечня Республикасында 2001 елдан бирле хезмәт итә, кисәтүләр алганнары юк. Мин аларның нәкъ шулай хезмәт итүләрен дәвам итәрләр һәм Татарстан милициясенең Россия Федерациясе Эчке эшләр министрлыгының иң яхшы бүлекләренең берсе булуын исбат итәрләр дип ышанам”, - дип билгеләп үтте Ђсгать Сәфәров.