Казан шәһәре Думасы президиумы XXXIX сессияне үткәрү мәсьәләсен тикшерде

5 мартта Казан Ратушасында Казан шәһәре Думасы президиумы утырышы булды. Шәһәр Думасының чираттагы XXXIX сессиясен үткәрү көнен тәгаенләү, аның көн тәртибенә тәкъдим ителгән мәсьәләләр буенча фикер алышып, сессиянең эшче органнарын билгеләү утырышка куелган иде.

Президиум әгъзаларыннан тыш, шәһәр Башкарма комитеты, аның урынбасары, шәһәр прокуроры, Дума депутатлары берләшмәсе җитәкчеләре катнашындагы утырышны ачып, Дума рәисе Илсур Метшин 1 март көнне Россия Федерациясенең 83 субъектының 79ында, шул исәптән IV чакырылыш ТР Дәүләт Советына депутатлар сайлау белән берлектә тагын 8 субъектта региональ парламент сайлаулары уздырылуын искәртте. Чыгышында ул Казан шәһәр Думасы депутатларыннан ТР Дәүләт Думасына депутат булып сайланганнарны барлап, сайлау округлары буенча күзәтү ясады һәм 2010 елның ноябрь аенда Казан шәһәре Думасына депутатлар сайлау кампаниясе булачагын искәртте.

Казан шәһәре башлыгы урынбасары һәм шәһәр Думасы рәисе урынбасары Людмила Андреева биргән мәгълүматларга караганда, сессиянең көн тәртибенә 18 мәсьәлә тәкъдим ителә, нигездә, хисап чыгышларыннан тора. Аерым алганда, анда мэрның, шәһәр Думасының, Башкарма комитетның, Конроль-хисап палатасының узган елдагы эшчәнлеге, муниципаль милекне приватизацияләүдә фаразланган планны үтәү һәм Казанда хокук бозуларны профилактикалау, җәмәгать тәртибен саклауны көчәйтү буенча 2006-2008 елларга каралган программаны тормышка ашыру буенча чыгышлар булачак. Шулай ук 2009 елга, пландагы 2010 һәм 2011 елларга каралган шәһәр бюджетына үзгәрешләр һәм өстәмәләр кертү хакында да сүз булачак. Болардан кала, тагын өстәмә рәвештә кертелгән мәсьәләләр дә бар. Көн тәртибен раслап, президиум 12 март көнне XXXIX сессияне үткәрү турында карар кабул итте, 10 мартта исә шәһәр Башкарма комитетының утырышлар залында Депутат көне үткәрү турында килешенде.