Бүгеннән башлап, Казанның рәсми сайтында шәһәрнең торак оешмалары рейтингы бирелә

29 гыйнвар көннән башлап Казан мэриясендә үткәрелгән чираттагы «дүшәмбе киңәшмәсе»ндә мэр Илсур Метшин, казанлыларның торак-коммуналь хуҗалык, торакны капиталь ремонтлау һәм агымдагы ремонт, шәһәр төзелеше мәсьәләләре буенча соңгы елда мөрәҗәгатьләрнең күп булуын исәпкә алып, Казан мэриясенең рәсми сайтында шәһәрнең торак милекчеләре һәм идарәче компанияләре һ.б. торак оешмалары рейтингын урнаштыру һәм порталның интернет-кабул итү сәхифәсендәге мәгълүматлар нигезендә даими рәвештә яңартып тору тәкъдиме белән чыккан иде. «Минемчә, бу торак оешмалары өчен үз хаталары өстендә эшләр өчен үзенә күрә этәргеч булачак», - диде ул.

Соңыннан мэриянең матбугат хезмәте хәбәр иткәнчә, нәтиҗәдә, бүгеннән башлап, kzn.ru порталында шундый мөмкинлек булдырыла (www.kzn.ru/rating). Анда хәзер 12 оешманың ничек эшләве, аларның халыкка хезмәт күрсәтүдә дәрәҗәсе белән танышырга мөмкин, болар исә шушы йортларда торучылардан мэрия сайты һәм массакүләм мәгълүмат чаралары аша алынган чыганаклар анализы буенча билгеләнә. Чөнки торак йортларга хезмәт күрсәтү буенча тискәре бәяләмәләрне казанлылар үзләре язып тора һәм ел башыннан бирле инде 86 шикаять алынган.

Казанның бөтен районнары буенча бирелгән торак оешмаларының рейтингында иң күп шикаять Киров районы оешмаларына (исемлектә 3 идарәче компания бирелгән) кагыла, аерым компанияләрдән Яңа Савин районының «Уютный дом» идарәче компаниясе мөрәҗәгатьләр буенча алда – 1 атнага 5 шикаять белдерелгән, ел башыннан бирле 12 һәм аннан Киров районының «Заречье» идарәче компаниясе дә калышмый: 1 атнага 6, ел башыннан бирле – 11 шикаять. Болар исә атна саен яңартылып торачак.