Министрлар Кабинетында кече бизнес субъектларын ташламалы кредитлау мәсьәләсе каралды

Кече бизнес субъектларын ташламалы кредитлау программасында катнашучы ТР Кече һәм урта бизнесны үстерү буенча комитет һәм коммерция банклары килешү төзиячәк. Ђлеге документ нигезендә, кече һәм урта эшмәкәрлек үсеше өчен максатчан кредитлар бирү шартлары билгеләнәчәк. Бу хакта бүген ТР Министрлар Кабинетында Премьер-министр Рөстәм Миңнеханов рәислегендә узган киңәшмәдә карар кабул ителде, дип хәбәр итә ТР Министрлар Кабинетының Матбугат хезмәте.

Билгеле булганча, Татарстан «Россия үсеш банкы»ннан («Внешэкономбанк»ның бүлендек предприятиесе) кече һәм урта бизнеска ярдәм итү өчен 3,5 млрд. сум тирәсе финанслар алачак. Республикада әлеге төр бизнесны кредитлау хокукын «Ак Барс», «Спурт», «Татэкобанк», «Татфондбанк», «Казан банкы» алган иде. Моннан тыш, финансларны ТР Кече бизнес лизинг компаниясе дә алачак.

Рөстәм Миңнеханов киңәшмәдә бизнеска ташламалы кредитлар бирүче коммерция банкларының маржасын 4-6 процент күләмендә чикләргә тәкъдим итте (әйләнештәге чараларын тулыландыру өчен – 4-4,5 процент, бизнесны башлау өчен кредитлауга – 6 процент). Премьер-министр кече һәм урта бизнес өчен ташламалы кредит чараларының үтемле булырга тиешлеген, бу акчаларның максатчан финанслар булуын ассызыклады. Хөкүмәт башлыгы Кече һәм урта эшмәкәрлекне үстерү комитеты вәкилләренә банкларның кредит комитетлары утырышларында катнашырга тәкъдим итте. Бу утырышларда комитет белгечләре сәнәгатьнең өстенлекле тармакларында эшмәкәрлекне үстерү белән бәйле ТР Хөкүмәте тарафыннан яклау тапкан проектларны да тәкъдим итәчәк.