Чаллыда “КАМАЗ–Мастер” командасын каршы алдылар

Чаллыда яшәүчеләр “КАМАЗ–Мастер” командасы әгъзаларын “Дакар–2009” марафон ралли–рейдында җиңүләре белән котлады. Чаллыга кайтуга ук җиңүчеләр “Азатлык” мәйданына килде.

“Бу бәйрәм – Чаллы өчен генә зур җиңү түгел, – диде шәһәр мэры Илдар Халиков. – “КАМАЗ” ААҖ генераль директоры Сергей Когогинга ярдәм күрсәткәне һәм команда җитәкчесе Семен Якуповка зур рәхмәт”.

“Дакар”да катнашучылар үзләре исә команданың туган якка җанатарларының көч биреп торуы аркасында җиңүчеләр булып әйләнеп кайтуын таный. “Узыш бер дә җиңелләрдән булмады”, – диде команда җитәкчесе Семен Якупов. “Дакар”ны Россиядә үткәрергә мөмкинме, дигән сорауга Семен Якупов “КАМАЗ–Мастер” рухында болай дип җавап бирде: “Әгәр нидер хакында хыялланасың икән, ул һичшиксез, чынга ашачак!”

Искәртеп узабыз, легендар командага Чаллыда зур хөрмәт күрсәтәләр: 2008 ел Чаллыда “КАМАЗ–Мастер” Командасы елы дип игълан ителде, шәһәрдә бер урам барлык узышлардан җиңү яулап кайтучы команда исеме белән аталган, дип хәбәр итә Автошәһәр мэриясе.