Казанда “Җисем” дип аталган икенче кинофестивальнең сайлап алу туры башланды

23 гыйнвар көнне Казанда балалаларның һәм яшүсмерләрнең “Җисем” дип аталган икенче кинофестиваленең сайлап алу туры башланды. Бүген бу хакта фестивальнең президенты, ТР Мәдәният һәм сәнгать академиясенең кинематография кафедрасы башлыгы, Татарстан Республикасының “Татарстан – синема” кино сәнгатен үстерү фонды генераль директоры Рамил Төхвәтуллин матбугат очрашуында хәбәр итте.

Быел кинофестивальне оештыручылар ул тагын да профессиональ, жанр ягыннан тагын да бай булыр һәм география тагын да киңәер дип өметләнә. Анда катнашучыларның яше чикләнмәгән: кинофестивальдә 1-11 сыйныф укучылары да, 1-6 нчы курс студентлары да катнаша ала. Иҗат эшләренең Татарстаннан гына һәм татарча булуы мәҗбүри түгел, бары тик татар телендә булмаган фильмнарны татар теленә тәрҗемә итеп җибәрү сорала.

““Җисем”нең идеясе балаларны һәм яшүсмерләрне кино сәнгатенә җәлеп итү”, - дип белдерә татар яшьләренең “Сәләт” иҗтимагый оешмасы җитәкчесе Җәүдәт Сөләйманов. “Сәләт”тә башлангыч алган бу кинофестиваль дөньяга балалар күзаллавы аша карау мөмкинлеген бирә дип санала. “Балалар үзләре турында, безнең турында үзләре сөйләсен”, - диләр оештыручылар.

Узган елда кинофестивальдә жюри хозурына җибәрелгән 36 хезмәтнең 20се катнашкан. Быел исә фестивальдә кинотасмалар “Кыска метражлы нәфис фильм”, “Иң яхшы юмористик фильм”, “Иң яхшы документаль фильм”, “Иң яхшы анимацион фильм”, “Хатын-кыз һәм ир-ат рольләрен иң яхшы башкаручы”, “Иң яхшы оператор эше”, “Иң яхшы сценарист”, “Иң яхшы режиссура” номинацияләрендә бәйләнә. Жюрины Рамил Төхвәтуллин җитәкли.

Кинофестиваль татар телен кинематография чаралары ярдәмендә саклау һәм үстерү максатыннан, ТР Яшьләр эшләре, спорт һәм туризм, ТР Мәгариф һәм фән министрлыгы, Татарстан Республикасының “Татарстан – синема” кино сәнгатен үстерү фонды, Татар кинематография берләшмәсе, ТДГПУ, Казан дәүләт мәдәният һәм сәнгать университеты, Бөтендөнья татар конгрессы башкарма комитеты, татар яшьләренең “Сәләт” иҗтимагый оешмасы белән берлектә уздырыла. Конкурсның йомгаклау этабы агымдагы елның 25-26 апрель көннәрендә булыр дип көтелә. Кинофестивальгә килгән фильмнарның Татарстанның җирле телевидениесеннән күрсәтелү мөмкинлеге бар.