Бөекбритания вузлары Татарстан студентларын кабул итәргә әзер

5 мартта КДУда ТР Хөкүмәтенең “Алгарыш” грантын тәкъдир итү булды. Бу чараны оештыручылар – ТР Мәгариф һәм фән министрлыгы, Казан дәүләт университетының Халыкара элемтәләр идарәсе.

Бөекбританиянең «University of Exeter» университеты вәкиле Шарлота Тейлор кунак итеп чакырылды, дип хәбәр итә КДУның матбугат хезмәте.

Очрашуга аспирантлар һәм өлкән курс студентлары җыелды. Шарлота Тейлор «Экзетер» университеты буенча мини-экскурсия үткәрде. Бу Бөекбританиядә дәрәҗәле һәм популяр югары уку йортларының берсе. Университетта югары квалификацияле укытучылар эшли, алар лекция генә укып калмый, ә тикшеренүләр алып бара, фәнни хезмәтләр язалар.

«Экзетер» университетында икътисад, финанслар, сәясәт фәннәре, халыкара мөнәсәбәтләр, педагогика, хокук, социология һәм башка белгечлекләр буенча уку мөмкинлеге бар. Ђмма тәкъдим уку белән генә чикләнми, вузда Россия клубы, футбол җәмгыяте, гольф яратучылар, хәтта шоколад яратучылар клубы да бар. Шарлота Тейлор һәркем үз теләгәнен табачак, дип ышандырды.

ТР Мәгариф һәм фән министрлыгының Россия һәм халыкара яшьләр белем бирү программаларын һәм проектларын координацияләү бүлеге җитәкчесе Лилиана Фәттахова да чыгыш ясады. Ул грантны үткәрү процедурасы һәм үзенчәлекләре турында җентекләп сөйләде, шулай ук конкурста катнашырга һәркемнең дә мөмкинлеге бар, кайбер сынаулардан курыкмаска гына кирәк, диде.

Студент һәм аспирантларны студентлар шәһәрчеге, анда яшәү үзенчәлекләре кызыксындырды. Очрашуны алып баручылар ТР Хөкүмәте грантларын алу конкурсы турында тулы һәм яңа мәгълүмат бирде. Грантлар буенча кызыксындырган сорауларга җавапны http://alga.tatar.ru сайтыннан табып була.