Әсгать Сәфәров Германия Эчке эшләр министрлыгы вәкилләре белән очрашты

22 гыйнвар көнне Татарстан Республикасы буенча эчке эшләр министры Әсгать Сәфәров Германия Эчке эшләр министрлыгы делегациясе белән очрашты.

Очрашуда шулай ук ТР буенча эчке эшләр министры урынбасары вазифаларын башкаручы Олег Степущенко, Россия Мөфтиләр шурасының халыкара департаменты җитәкчесе Рушан хәзрәт Аббасов, Германия Эчке эшләр министрлыгының гомуми мәсьәләләр, Ауропа һәм халыкара үсеш мәсьәләләре буенча Департаменты җитәкчесе Маркус Кербер, Германия Эчке эшләр министрлыгының дин һәм халыкара үсеш буенча GII бүлеге җитәкчесе Михаэль Фрезе, Германиянең РФдәге федераль полициясе рәсми вәкиле Маркус Хайнке катнашты.

Татарстан эчке эшләр министрлыгы җитәкчесе билгеләп үткәнчә, “бүгенге көндә күп кенә мәсьәләләрне хәл итүдә без чит ил хезмәттәшләребез белән эшлибез, аларның тәҗрибәсен өйрәнәбез һәм кулланабыз”. Министр Германия Эчке эшләр министрлыгы югары квалификациягә ия полиция хезмәткәрләре әзерләү өлкәсендә безнең өчен үрнәк булып тора, дип билгеләп үтте. Моңа Әсгать Сәфәров 2007 елның июнь аенда Россия делегациясе составында Мюнстер шәһәрендә югары полиция мәктәбендә булып инанган.

Очрашу вакытында ике ил арасында ислам экстремизмына каршы тору буенча хезмәттәшлек һәм тәҗрибә уртаклашу мәсьәләләре буенча фикер алышынды, дип хәбәр итә ТР Эчке эшләр министрлыгының матбугат хезмәте.

Әсгать Сәфәров республикада тотрыклы социаль-сәяси хәл урнашты, төрле этник һәм конфессиара төркемнәрнең мәнфәгатьләре балансы саклана, дип билгеләп үтте. “Без турыдан-туры милли, этник диаспора һәм төп конфессия җитәкчеләре белән эшлибез, дини экстремизм һәм милләтара аерма мәсьәләләре буенча даими фикер алышабыз”, – дип ассызыклады министр.