“Ана” капиталы акчасы белән торак сатып алу (төзү) өчен кредитлар, заемнар капларга була

20 гыйнвар көнне ТР Министрлар Кабинетында үткәрелгән брифингта РФ Пенсия фондының ТР буенча бүлеге идарәчесе Марсель Имамов журналистларга “ана” (гаилә) капиталы дәүләт сертификаты акчасын торак сатып алу (төзү) өчен кредитлар яки заемнар һәм ипотека килешүләре буенча процентлар түләүгә һәм төп бурычны каплауга тотарга мөмкин булуын, аның тәртипләрен шәрехләде.

2008 елның 25 декабрендә гамәлгә кергән Федераль закон (228-ФЗ) буенча, 2007 елның 1 гыйнварыннан башлап икенче, өченче һәм алардан соңгы балаларның туган (уллыкка яки кызлыкка алынган) көне буенча срок үткән булуга карамастан, торак сатып алу (төзү) өчен кредитлар яки заемнар, шул исәптән ипотека кредитлары буенча 2010 елның 31 декабренә кадәр оешмалар белән килешү төзегәннәр “ана” (гаилә) капиталын шушы түләүләргә - төп бурычны һәм кредит яки заем процентларын каплауга тота алалар, ләкин аларның элек мондый мөмкинлекне – дәүләтнең өстәмә ярдәмен кулланмаган булулары шарт. Бу мөмкинлек шулай ук икенче, өченче һәм аннан соңгыларын уллыкка яки кызлыкка алган бердәнбер кеше булган аталар да куллана ала, ләкин уллыкка яки кызлыкка алу турында суд карары 2007 елның 1 гыйнварыннан башлап законлы көченә кергәнлеге һәм аларның дәүләтнең өстәмә ярдәменнән кулланмаганлыгы таләп ителә.

“Ана” (гаилә) капиталы хәзерге вакытта 299 мең 731 сум 25 тиен тәшкил итә. Аны торак мәнфәгатьләрендә куллану өчен Пенсия фондының тору урыны буенча бүлегенә гариза белән мөрәҗәгать итәргә кирәк (нинди документлар кирәклеге РФ Пенсия фондының ТР буенча бүлеге сайтында әйтелә). М.Имамов сүзләренчә, РФ Пенсия фондының ТР буенча барлык территориаль органнары “ана” (гаилә) капиталы белән идарә итү буенча гаризалар җыю белән мәшгуль, 11 гыйнвардан инде 250дән артык гаилә әлеге дәүләт сертификатын Пенсия фондлары органнарына китереп тапшырган, тагын 785 гаилә тикшерелә, сертификатларның 99,6 проценты - барлыгы 33 мең 220 данә кулга тапшырылган.