Р.Миңнеханов: «Хакимият органнарының дөрес карар кабул итүе өчен оператив мәгълүмат кирәк»

Мәгълүм булганча, статистика органнарының бурычы, бер яктан, дәүләт һәм муниципаль органнар эшчәнлегенең мәгълүмати нигезен формалаштыру булса, икенчедән, кулланучыларны халыкара стандартлар нигезендә ышанычлы мәгълүматлар белән тәэмин итү. Соңгы елларда әлеге органнарның эшчәнлегендә оперативлык, нәтиҗәлелек артты. Бүгенге шартларда алардан тагын да мобильрәк эш итү сорала. Бу хакта бүген Дәүләт статистикасы федераль хезмәтенең Татарстан идарәсе белән ТР Социаль-икътисади мониторинг буенча комитетының уртак коллегия утырышында ТР Премьер-министры Рөстәм Миңнеханов белдерде. Анда әлеге ведомстволарның 2008 елдагы эшчәнлегенә йомгак ясалып, агымдагы елга бурычлар билгеләнде.

Статистика органнарының эшчәнлегенә уңай бәя биргән Хөкүмәт башлыгы, бүгенге шартларда алар тәэмин итә торган мәгълүматка таләпнең дә, ихтыяҗның да зур булуын ассызыклады. «Дәүләт, муниципаль хакимият органнары эшчәнлегендә статистиканың роле, әһәмияте елдан-ел үсә бара. Дөрес идарә карарлары кабул итү алар биргән мәгълүматка нигезләнеп башкарыла. Соңгы елларда статистика органнары эшендә уңай үзгәрешләр шактый. Алар биргән мәгълүматның эчтәлеге, сыйфат дәрәҗәсе күпкә үзгәрде. Шуңа да карамастан, аларга карата таләпләр елдан-ел арта, шул сәбәпле алга куела торган бурычлар да катлаулана бара», – ди Рөстәм Миңнеханов. Аның фикеренчә, дәүләт һәм муниципаль органнар бүген тагын да тулырак мәгълүматка, җентекле аналитик материалга мохтаҗ. Премьер белдергәнчә, бүген глобаль-икътисади кризис шартларында, вакытлы һәм дөрес карарлар кабул итү өчен статистика органнарының тагын да оператив рәвештә мәгълүмат белән тәэмин итүе кирәк.

«2008 елның 4 нче кварталы глобаль кризис республикада да үзен сиздерде. Кризис гражданнарның тормыш дәрәҗәсенә йогынты ясый. Бүгенге көндә төп бурыч – халыкның яшәү дәрәҗәсен тәэмин итү. ТР Президенты белдергәнчә, финанс-икътисади кризисы социаль кризиска әйләнергә тиеш түгел. Шуңа төп бурыч булып дәүләт, муниципаль хезмәтләрне халыкка вакытында күрсәтсен өчен гамәлдәге социаль-мәдәният учреждениеләре челтәрен саклап калу. Икенчедән, икътисади потенциалны, республиканың барлык тармакларда предприятиеләр эшчәнлеген саклап калу», – ди Хөкүмәт башлыгы. Аның белдерүенчә, шушы шартларда идарәне тормышка ашыру өчен һәр предприятиегә кагылышлы объектив мәгълүмат таләп ителә. Аны статистика органнары хакимият органнарына айга бер тапкыр түгел, ә һәр ун көн саен ирештерергә тиеш. «Ышанычлы мәгълүматлар кичекмичә тармак, муниципаль, төбәк җитәкчеләренә барып ирешергә тиеш», –дигән бурыч куйды Премьер-министр. Бүген республика алдындагы бурычларны хәл итүдә статистика органнары бәйләүче буын ролен үти. Шуны күздә тотып Рөстәм Миңнеханов статистика органнарын тармак министрлыклары, беренче чиратта, Икътисад, Хезмәт, мәшгульлек һәм социаль яклау министрлыклары белән тыгыз эшләргә чакырды. Хөкүмәт җитәкчесе шулай ук әлеге органнар эшчәнлегендә мәгълүмат технологияләреннән актив файдалану кирәклегенә, муниципаль органнарның эшчәнлеген оператив, җентекле статистика мәгълүматлары белән тәэмин итү кирәклегенә басым ясады.