“Казан” Халыкара аэропорты 2008 елда 751504 пассажирга хезмәт күрсәткән

19 гыйнвар көнне “Казан” Халыкара аэропорты 2008 елда 751504 пассажирга хезмәт күрсәткән. Бу 2007 елга караганда 21,9 процентка артыграк, дип хәбәр итә аэропортның матбугат хезмәте.

Халыкара юнәлешләрдә (ерак чит илләр һәм БДБ дәүләтләре) пассажирлар агымы 315255 пассажир тәшкил иткән, бу 2007 ел күрсәткечләреннән 29,5 процентка артып китә. Эчке юнәлешләрдә исә пассажирлар агымы 436249 пассажир тәшкил иткән, бу 2007 ел дәрәҗәсеннән 17 процентка артыграк.

Мәскәү, Калининград, Санкт–Петербург, Ереван, Ташкент, Дүшәнбе, Худжант, Анталия, Варна, Дубай, Ираклион, Истанбул, Хургада, Шарм–әл–Шәйх юнәлешләрендә пассажирлар саны аеруча күп арткан. Әлеге маршрутлар буенча 2008 елның 12 ае эчендә Казан аэропортында 658965 кешегә хезмәт күрсәтелгән, бу узган елның шул чоры белән чагыштырганда 26 процентка күбрәк.

2008 елда пассажирлар агымы ишәюгә яңа рейслар ачылу һәм гамәлдәге юнәлешләрнең ешлыгын арттыру хисабына ирешелгән. “Казан авиапредприятиесе” Казан – Уфа – Екатеринбург, Казан – Самара – Казан һәм Самара – Казан – Пермь маршрутларын ачкан. 2008 елның маенда “Дальавиа” авиакомпаниясе Казан аэропортыннан Барнаулга тәүге рейс ясаган.

“Татарстан” авиакомпаниясе Дүшәнбегә даими рейслар санының ешлыгын атнасына өч тапкырга кадәр арттырган. Хургада, Шарм–әл–Шәйх, Дубай, Анталия юнәлешләрендә туристлык чартер рейслары ясау ешлыгы да арткан. Җәйге сезонда Барселона (Испания), Варна (Болгария), Пулу (Хорватия) шәһәрләренә яңа рейслар сериясе ачылган.

“Казан” Халыкара аэропорты” ачык акционерлык җәмгыяте “РФ һава транспорты лидеры” номинациясендә премия лауреаты булган һәм 2007 ел нәтиҗәләре буенча “Интенсив үсештәге аэропорт” номинациясендә “БДБ илләренең иң яхшы аэропорты” конкурсының җиңүчесе дип табылган.

Аэропортны реконструкцияләү мәсьәләсен хәл итү 2008 елның мөһим вакыйгасы булган. Болгариянең “Химимпорт” холдингы “Казан” Халыкара аэропорты” ААҖнең стратегик инвесторы сыйфатында чыгыш ясаган. Казанда 2013 елда узачак Универсиадага аэропорт елына 5 миллион пассажирга хезмәт күрсәтергә ниятли.