И.Метшин: «Минтимер Шәймиев абруе исәбенә генә Казан Универсиадасы проекты гамәлдә»

19 гыйнвар көнне Казан мэриясендә шәһәр Башкарма комитеты бүлекләре һәм муниципаль берәмлекләр органнары җитәкчеләренең «дүшәмбе киңәшмәсе»ндә мэр Илсур Метшин үзенең 16 гыйнвар көнне РФ Хөкүмәте йортында XXVII Бөтендөнья җәйге универсиаданы әзерләү һәм үткәрү буенча уздырылган киңәшмәдә ТР Перзиденты һәм Премьер-министры, кайбер министрлар һәм ведомстволар җитәкчеләре белән берлектә катнашуын, анда РФ Хөкүмәте рәисенең беренче урынбасары, «Универсиада-2013»не оештыру комитеты рәисе Игорь Шувалов шулай дип игълан итүен җиткерде.

«Халыкара проектларның барысы да әһәмиятле, кирәкле, әмма Универсиада проектын РФ Хөкүмәте, чыннан да, Татарстан Президенты Минтимер Шәймиев абруеның зур булуы сәбәпле генә дәвам иттерә. Татарстан җитәкчесенә сәяси мәйданда озын гомер телибез. Шушы халыкара уеннарны үзебездә үткәрү хокукы өчен көрәштә җиңеп чыгу беренче әһәмиятле бурыч булса, икенче бурыч – шушы җиңүне тормышка ашыру», - дип, мэр 2009 ел проектлау елы гына түгел, төзелеш елы да булачагын игълан итте. Аның сүзләренчә, Универсиада өчен Казанда төзеләчәк 36 объектныңϰ 29ы федераль бюджеттан финансланачак, һәрхәлдә, бу хакта Мәскәүдә барган киңәшмәдә хәл ителгән. Моннан тыш, анда Казан Универсиадасына бәйле беренче әһәмияткә ия мәсьәләләр дә каралган:ϰ спорт корылмаларын, Универсиада авылын проектлау һәм төзү, төзеләчәк объектлар исемлеге расланган. Төзелешне исә 3 төркемгә бүлеп карап була: спорт, яшәү, транспорт инфраструктуралары. «Универсиада кунаклары һәм спортчылар өчен яшәү инфраструктураларыннан иң мөһиме – Универсиада авылы, ул студентларның спорт уеннарында катнашачак 10 мең кешене кабул итәрлек булырга тиеш. Халыкара уеннардан соң исә студентлар кампусы сыйфатында хезмәт итәчәк объект булачагын да онытырга ярамый», - дип искәртте И.Метшин.

Мәскәү киңәшмәсендә И.Шувалов, РФның кризиска каршы төзелгән штабы илнең барлык төбәкләрендә дә юл төзелешен үстерү буенча тәкъдимнәр әзерләнә, дип белдерде, димәк, болай булгач, Казанның транспорт инфраструктурасы төзелешенә шактый зур өлеш кертеләчәк, дип саный мэр. Төзелеш объектларын финанслау турындагы карар безнең өчен бик әһәмиятле, вакытында өлгертертү максатында инде проектлау өчен акча бирү турында йөкләмә бирелде, хәзерге вакытта РФ Финанс министрлыгы һәм башка ведомстволары белән берлектә Казанда төзелә башлаган объектларны финанслау мәсьәләсе карала һәм, 2009 ел проектлау елы гына түгел, төзелеш елы да булсын өчен, алга таба да бу эш дәвам иттереләчәк, дип басым ясап әйтте ул.