Фирдәвес Кәбиров – “Дакар–2009” чемпионы

“Дакар–2009” марафон ралли–рейды “КАМАЗ–Мастер” командасының триумфы белән төгәлләнде. Фирдәвес Кәбиров экипажы йөк машиналары зачетында җиңде, ә Владимир Чагин икенче урынны яулады.

506нчы экипаж – Фирдәвес Кәбиров, Айдар Беляев, Андрей Мокеев – “Дакар–2009” ралли–рейдының соңгы махсус участогында 227 чакрымны 1 сәгать 49 минут 56 секунд эчендә буйсындырды. Владимир Чагин үзенең штурманы Сергей Савостин һәм механик Евгений Николаев белән бергә икенче булып килде. Шул рәвешле “КАМАЗ–Мастер” сигезенче тапкыр планетаның иң абруйлы ралли–рейдында җиңүгә иреште, ә Кәбиров икенче мәртәбә чемпион калды.

Жерар де Рой GINAF йөк машинасында өченче урынны яулады. Ә Илгизәр Мәрдиев җитәкчелегендәге “КАМАЗ–Мастер” экипажы дүртенче урын белән канәгатьләнде.

Җиңел автомобильләр зачетында лидерлар рәтендә барган “Фольксваген” экипажлары команда җитәкчелегенең боерыгын үтәп, “үзара мөнәсәбәтләрне ачыклыйсы итмәде”. Жинель де Вильер – Дирк фон Зитевиц экипажы “Дакар” этапларында дүртенче мәртәбә җиңү яулады һәм “Фольксваген”га беренче чемпионлык алып килде. Икенче бер “Фольксваген” экипажы (Марк Миллер – Ральф Питчфорд) икенче урынга лаек булды. Америка узышчысы Робби Гордон “Хаммер” прототибында бронза медаль яулады.

14нче этапта россияле Леонид Новицкий икенче булып килде – ул Де Вильердан нибары 22 секундка калышты. Гомуми зачетта Новицкий һәм аның штурманы Олег Тюпенкин сигезенче урынны алды.

Мотоцикллар зачетында испан узышчысы Марк Кома икенче урынны алды. Француз Сирил Депре өченче урын белән канәгатьләнде, ә гомуми зачетта “Дакар–2007” ралли–рейды чемпионы икенче урынны яулады.