Ф.Мөхәммәтшин Мәскәүдә төбәкләрдә социаль-икътисади вәзгыятькә кагылышлы киңәшмәдә катнашты

16 гыйнвар көнне “Бердәм Россия” партиясе Татарстан төбәк бүлеге Сәяси советы секретаре, ТР Дәүләт Советы рәисе Фәрит Мөхәммәтшин Мәскәүдә төбәкләрдәге социаль-икътисади вәзгыять һәм “Бердәм Россия” партиясенең Россия Федерациясе субъектларында дөньякүләм финанс кризисы нәтиҗәләрен бетерү буенча өстенлекле бурычлары турында фикер алышу буенча киңәшмә эшендә катнашты.

Татарстанда республиканың дәүләт хакимияте, башкарма хакимиятнең федераль органнары территориаль бүлекчәләре һәм җирле үзидарә органнары эшчәнлеге координациясе тәэмин ителгән. Финанс, икътисади, җитештерү һәм социаль өлкәләрдә кризиска каршы чараларны тормышка ашырганда фәнни һәм иҗтимагый оешмалар вәкилләре, эшмәкәрләр белән элемтәләр салынган. “Бердәм Россия” партиясенең төбәк бүлеге тарафыннан Кризиска каршы совет төзелгән, ул ТР Хөкүмәте карамагындагы Икътисади совет белән тыгыз эшли. ТР Президентының 2008 елның 29 декабрендә чыккан Указы белән, Татарстан Республикасы икътисадын дөньякүләм финанс кризисы шарталарында үстерү буенча республика комисиясе төзелгән. Ул финанс кризисның социаль кризиска әйләнүен булдырмауны күз алдында тота.

Моннан тыш, Мәскәүдә ТР парламенты рәисе Фәрит Мөхәммәтшин РФ Үзәк сайлау комиссиясе рәисе Владимир Чуров белән очрашып, ТР Дәүләт Советына узачак сайлауларны оештыру мәсьәләләре турында фикер алышты.